喺本港，想搵部內置GPS嘅PDA或者手機，可謂易如反掌，款式之多，唔單止令人花多眼亂，而且售價低至$2,500左右就有交易，抵玩到震！可惜喺香港用GPS嘅機會唔多，例如穿梭高樓大廈之際，便經常發生接收中斷，同時，因香港地方細，加上大部份景點已有清晰指引，GPS根本無用武之地！
開普敦GPS必備
自從小記喺上星期遠赴南非第二大城市──開普敦（CapeTown）之後，即被當地大自然環境，例如山脈、地勢、氣候所吸引住；更重要係，面對萬里無雲嘅景色，鍾意自己租車嘅旅遊人士，必然隨身帶定一部GPS導航系統，先至最穩陣！
除咗開普敦市中心一帶，如果想走去著名景點遊覽，無GPS肯定會迷失！唔係嚇你，好似小記出發到好望角（CapePoint）當日，只係經過山腳一段路程，即被濃霧圍攻，莫講話睇唔見面前嘅路牌，就連前方有無車行緊都係靠估，能見度50米都唔知有無！行過呢段路，之後就會見到桌山（TableMountain），嗰處雖然能見度清楚得多，但每一條草、馬路幾乎差不多樣，假如無當地司機扮作「人肉GPS」幫你帶路，自己租車肯定蕩失！
標價$7,600
但話說回來，想喺南非閒閒哋買部GPS嚟玩，原來都係奢侈品！好似商場標價就高達R8499（折實港幣約$7,600），款式唔係特別靚、分唇又唔係特別強，純粹一部普通CarKitGPS，相對香港價錢認真高消費。所以，如果大家有機會到南非租車自助旅遊，記得買定一部GPS先好！
記者、攝影：陳國輝