呢個夏天香港真熱鬧，四年一度世界盃、李家二少世紀大刁、陳四萬上街宣示實力、學成歸來的葉劉埋班……單單都係「有手尾，未解決」，真係要幾精采有幾精采！最新鮮熱辣而且又好關大家事嘅，就要數我哋偉大特區政府唔理市民反對，諗住學人收銷售稅！
咁𠵱家先係諮詢，大家使唔使因為俾政府打劫而上街都未知，但中環消息人士就話，我哋嘅唐老鴨司長呢鋪幾難如願，因為老百姓及大多數議員反對之外，最重要係，連高級過佢嘅人都根本唔撐佢，兼夾有少少跣佢一鋪嘅成份！
中環消息人話，唐老鴨一向得中南海班「真正老細」歡心，係有意扶佢更上層樓，就算做唔到「冧巴溫」，都撈番個政務司司長做，於是乎，有人不是味兒，成日搵位等佢出醜「high」鑊，而今次就係百年一遇好機會，成單嘢交晒畀佢incharge，一個唔該，真係要幾甘有幾甘！
吹風會露端倪
大家都見，佢老細煲呔曾前幾日去獅城食肉骨茶嗰陣，話明銷售稅仲有好多時間傾，政府會考慮長遠係咪對香港有利先落實云云……
但更重要係月初個吹風會，選擇性地向個別傳媒放料，表面係唐老鴨親疏有別、安排混亂，但據聞實情係唐老鴨本身唔打算咁安排，仲同負責吹風嗰位老哥拗數，點知人家有大老細撐，根本當唐老鴨唱歌，而事後呢，唐老鴨仲要喺祈禱會俾人抦一嘢，話佢嚴重損害政府公關……
所以話呢，公子哥兒要同人鬥，真係要浸多幾年先；至於開新稅，簡直係政治自殺，除咗班會計佬，全中環你話仲有邊個會支持？
李華華