江山代有才人出，一代新人勝舊人，葉劉淑儀自史丹福攞第二個碩士學位返嚟（葉太現在一共有三個碩士學位），餘威猶在，一聲出山，記者蜂擁而至。葉太開記者招待會，介紹「匯賢智庫」，佢啲現時班底，幾乎位位係史丹福校友，而且甚為年青㖭，呢班青年才俊，位位精英，喺史丹福畢業，信心特別爆棚。葉劉大講香港經濟轉型/新科技，肯定係呢班新進獻計啦。中大校長劉遵義就係史丹福大學經濟系著名教授，香港最出名嘅一位史丹福校友，加上副校長廖柏偉係史丹福經濟系博士，佢哋嘅年紀就大啲，唔知葉劉會唔會搵埋劉校長廖教授做顧問呢？
唔好以為呢班人只講經濟，政治上冇經驗。記唔記得香港興業呀？香港興業大老闆查濟民喺八十年代初已有資格直入中南海見鄧小平、趙紫陽。許家屯對查老甚為尊重。嗱，查老三位公子懋聲、懋成、懋德都係史丹福校友，查家捐款畀史丹福，甚為慷慨，葉劉以校友身份邀請查家幫手，有無可能呢？
仲有，好多年前，榮公子智健㩒錯投注寶，喺馬場贏咗大大大筆錢，後來將筆錢加碼，捐咗成三千萬港元做獎學金基金，專門資助中國學生到史丹福讀書，已培養咗不少人才，葉劉搵榮公子幫手，唔會托手踭吖嘛？數落去，李澤鉅、李澤楷，加上李國寶二公子李民斌，梁劉柔芬議員嘅愛女（凡識得嘅都話梁小姐係靚女才女）……喺香港直情係人多勢眾，才財兼備，由史丹福幫管治香港，有何不可。
七八十年代，印尼政府嘅財經系統由加州大學柏克萊校友把持，世稱BerkeleyMafia，八十年代智利推翻左翼政權後，全國經濟由芝加哥大學經濟系校友發號施令，世稱ChicagoBoys，假如香港進入二十一世紀第二個十年之後，由以葉劉為首嘅史丹福人馬統領特區政府，叫佢哋做乜好呢？StanfordGang還是StanfordTechies？以校友之名，請Google、Yahoo嘅大股東校友來港投資，搞香港高科技，可能話咁易，唔好當香港人係阿福就得嘞。