侍仔：紐卡素圖圖盃贏咗尼斯特朗3:0，終於可以殺入歐協盃第2圈啦！
招積域：紐記經常要靠呢啲盃仔賽去爭踢歐洲賽，覺得佢走緊後門。
菠蘿文：你吹佢唔脹喎！鬼叫佢聯賽上季排第7，有得走去踢圖圖盃呢隻後門咩！
侍仔：不過紐記呢隊波，都係嗰隻有好球員，但踢極都踢唔起嘅球隊。有奧雲同盧基，但一個無態，一個就長傷，即係有等於無。
招積域：但佢上季尾個勢好勁，6勝1和，最後嗰場仲贏埋車仔添！
菠蘿文：卜比sir在位時候都曾經好景過，02-03年度歐聯分組賽，隊波先輸3場，後尾3場贏晒祖雲達斯、基輔戴拿模同飛燕諾出線次階段賽事，幾威呀！
老舒垂簾聽政？
侍仔：陳年舊事重提？唔該放眼今季聯賽啦！
招積域：今季有杜夫加盟，仲有羅達坐正，紐記今季有運行。
菠蘿文：羅達？嗰年做韋斯咸領隊做到就死嗰個？但聽講老舒會垂簾聽政喎！
肥牛：呢個都有機會㗎！老舒講過話佢遲早會教紐記，𠵱家咪有個機會跟羅達學嘢。
侍仔：死肥牛又有道理喎！果然係我哋茶記嘅名家。
招積域：但紐記今季無咗奧雲同埋舒利亞，佢兩個上季加埋入咗17球，唔通真係靠艾美奧比？
菠蘿文：都仲有個尼索比亞可以入到波嘅。
侍仔：我信紐記有希望，因為有羅達，好嘅領隊係球隊成功嘅一半。
招積域：當年佢幫韋斯咸拎最高分降落英冠，都幾勁呀！有祖高爾、廸肯尼奧又有「鐵衞」兼國腳比連在陣，都可以降班。
菠蘿文：你收聲啦！飲埋杯嘢就好返工。
高洛文