資深股票客戶謝太：喂，Karen，你今次真係好嘅唔靈，醜嘅靈囉！上個禮拜一朝頭早，你話下半年股市會好似被海嘯破壞咁淒慘。點知幾個鐘後，印尼真係再次發生海嘯……
年輕貌美經紀Karen：謝太，我知、我知。我都估唔到我貼地震海嘯，貼得咁準。上個禮拜一，有同事聽到我咁同你講之後，成個禮拜都畀佢哋笑，佢哋叫我轉行做地質學家，唔好做股票經紀㖭。我下次都唔敢喺講股票時，用啲死人冧樓、天災人禍嘅比喻，因為就算再生動都好，將來好似你話齋好嘅唔靈，醜嘅靈，咁就冇陰功。不過去到底畀人笑都係自己攞嚟，講咗幾個禮拜話個市會跌，都係冇跌，但一講海嘯，就有海嘯，好邪。
謝太：可能你睇嘢真係咁叻呢，個市下半年會聽你話跌呢。不過講番個市，上個禮拜美國聯儲局主席又好似話8月唔加息。你叫我買嘅兩隻熊證，6211同6205已經潛水，比起上個禮拜嘅入市價跌咗唔少。我係唔係應該繼續揸？
熊證繼續揸 咪沽
Karen：揸！一定繼續揸，你會冇事嘅。其實，自從伯南克做聯儲局主席之後，聯儲局一路都只係話「已經過咗自動加息期」，冇講過停止加息，亦冇講過會繼續加息。即係話，乜嘢關於息口走勢嘅決定，都會睇經濟數據做人。呢個就係市場覺得伯南克比起格林斯潘，最唔掂嘅地方。因為喺格林斯潘年代，「已經過咗自動加息期」就等如加息完結，通脹已受到控制，甚至可以話一切受到控制。格林斯潘畀投資者嘅形像，就好似個有「天眼通」嘅飛機師一樣，乜都睇到晒，就連三四年之後會發生嘅嘢，例如通脹率會點、失業率喺乜嘢水平都知，今日開始加息，就知道二十個月後，加十二次息就會停。唔似伯南克連三四個月後嘅通脹率都唔知。
謝太：如果咁講，即係話市場覺得格林斯潘年代就「完全受控」，伯南克就「聽天由命」，甚至可以話「完全失控」？
Karen：係啊！上個禮拜個市升，都係因為伯南克嘅說話，不過佢用口嘅托市能力只會愈來愈少，因為市場參與者會愈來愈唔信佢。市場一對聯儲局冇信心，股市就會跌。信我啦謝太！