有打機嘅都應該知《無雙》呢幾年賣到開巷，無論三國時代定係日本戰國都勁多人煲，㩒掣劈友日日如是。舊年名廠Capcom將自己嘅寶貴開發經驗，注入東瀛名將DNA炮製咗隻《戰國Basara》出嚟，嗰種華麗風格使人拍案叫絕，如今第二集亦即將見街，新人新Mode新玩法通通有齊，加埋個宮本武藏真係大有青出於藍之感！
文：陳福榮
經過整年洗禮，呢隻續集好多地方都畀人眼前一亮嘅感覺，模式多咗唔在講，系統亦跟隨有所強化，可使用登場角色更由16個增至22個，整體內容份量幾乎係上集打孖計。唔提儲爆晒所有人能力值同道具啦，就算逐個爆一次機都幾係嘢，好彩Capcom擅長製作只此一家嘅打鬥遊戲，隻抽嗰陣真係Feel到同千軍萬馬浴血緊，而並非係咁意掃走紙板人嗰隻，嗰種臨場感確係好到肉。
今次多出嚟嗰6個新人，除咗長曾我部元親、毛利元兩個角色響上集係敵方專用之外，其餘幾位都係完全新角，最引死人就固然係前田慶次及宮本武藏。無他嘅，前者實在豪快到極點，做第一男主角應該無人敢反對，至於武藏就係好多人心目中嘅英雄，就算佢變成個𡃁仔咁款兼且手執船槳取代雙劍，依然有好多人擁戴佢，呢點確係非常難得。
天下統一爭最強稱號
基本上遊戲可以分為故事與天下統一兩大模式，話明故事當然係畀大家透過戰鬥，從而了解有關人物喺日本戰國歷史上嘅定位，所以好多都係依照史實嚟改編。只要打爆指定角色，就可以令隱藏人物逐一現身，再者每關都有唔少花心思嘅設計，達成指定條件會有額外經驗值或者金錢獎賞，連同最能延長遊戲壽命嘅儲物系統，襟玩指數一定滿瀉！
玩法類似上集嗰個天下統一模式，基本流程分別唔大，但佢所加嘅搶奪財寶與稱號評價就令可玩性大幅加倍。儘管都係將周圍據點逐一擊破，當中締造嘅成績和難易度會影響所得稱號，全部總有52種，想全數取得甚至再拿稀有道具，就非常講求玩家嘅實力以及係咪了解遊戲攻略技巧咯。仲有，第三個模式係替角色儲經驗值嘅大武鬥會，只要能夠連勝一百場即能取得最強裝備，不過咁就難度超高，各位都係畀心機練好基本功至諗佢啦。
究極Basara技屈機至極
喺戰鬥層面嚟講，今集嘅角色專用道具又真係非常之搞鬼，而且部份武器同防具裝上身後都好有型，玩起嚟確係格外醒神。譬如主角前田慶次嘅長刀，換咗做升級版之後不但刀身就連刀鞘都唔同晒，此外佢亦有專用嘅面具可以裝備，特定條件下會整到啲雜兵陪你齊齊跳舞，咁嘅話想之後幫佢地埋單亦係EasyJob啦。
而新加嘅戰鬥系統方面，最重要就肯定係「BasaraFever」、「戰極Drive」同「究極Basara技」呢三個。先講會受到ChainHit影響嘅「BasaraFever」，當連續擊中次數超過100咁就會自動開始，而到200、300甚至400亦會繼續升級，直至500就變成Fever狂加攻擊力同防禦力，執嘅錢亦會更多，所以將班敵人Group埋嚟一齊打係好有必要。「戰極Drive」可當作為人手發動嘅能力增幅器，每打敗100名敵人就會增加一級，儲滿後即可按掣發動，響一定時間內變得極強，如果喺呢個時候發動本身經已好勁嘅「Basara技」，佢就會昇華成勁到拆天嘅「究極Basara技」，到時各頭目都會任君魚肉。
中文攻略本 同期推出
以今集遊戲系統，有攻略支援自然玩得輕鬆好多，中文官方攻略本將同期推出，收到風係由台灣青文嗰邊執筆，入面有好多啱使嘅攻略資料，適合玩家一路玩一路Check番有無攞漏嘢。隨Game將會附送精美電話繩，一共有5款，全部都係取自《戰國Basara2》嘅主要角色武器。另外遲啲日本會出套TradingCard，玩法都係典型日式卡片遊戲，鍾意本作畫師插圖嘅朋友不妨下個月昅昅各大卡舖。
機種：PS2
廠商：Capcom
類型：ACT
人數：1人
推出日：7月27日
價錢：$388
(C)CAPCOMCO.,LTD.2006ALLRIGHTSRESERVED.
