舞台劇籌120萬善款
馮仁昭四圍超：寶珠、秋官暴食鬥瘦

陳寶珠同鄭少秋主演嘅舞台劇《天之驕子》前晚幫東華三院籌咗120萬，馮仁昭都有去探班，發現佢兩個瘦咗好多，唔通佢哋呢期鬥瘦？寶珠姐話呢幾日排練太緊密，所以成個人瘦晒，秋官話瘦到都唔敢上磅。
問寶珠姐同秋官係咪太緊張食少咗嘢？佢哋竟然話比平時仲食多咗，寶珠姐平時一日兩餐，下晝多數食粉麵，但𠵱家一定食飯。秋官就話：「我感冒未清要戒口，但點都每餐食一碗飯，開騷前食麵就易消化啲，我食嘢好清，以菜同豆腐為主，份量都唔少㗎！」秋官話呢兩晚每當摸寶珠姐時，觀眾反應都好受落，佢話可能觀眾鍾意佢鹹濕寶珠喎！

派相惹混亂

另外，噚日寶珠姐同無綫總經理陳志雲去書展宣傳《志雲飯局》VCD，吸引大批fans圍觀外，方逸華都專程嚟撐場，點知寶珠姐派簽名相時，班fans好瘋狂咁爭，搞到場面幾混亂。