李彩華師妹、年僅18歲的江若琳最愛夏日，尤其喜歡到沙灘嬉戲，她日前在30多度的高溫下到海邊穿上泳裝大晒24吋纖腰，玩到㷫烚烚，除了大啖冰條凍飲，更即時跳落水降溫。
正值18歲卜卜脆年紀的寰宇新人江若琳，近日在內地與師姊李彩華和謝霆鋒，合作新劇《詠春》，因要配合動畫《多啦A夢——大雄的貓狗時空傳》宣傳，她日前回港工作，忍不住抽空到海灘嬉戲，穿上泳裝的她大玩沙灘波，弄至香汗淋漓，便即玩水和吃雪條消暑。
落選女角獲青睞
江若琳早前參加寰宇電影公司的招募女主角行動，雖然落敗未能參演劇集《伙頭智多星》，但塞翁失馬，最終獲寰宇老闆娘林小明太太青睞，簽約成為旗下新人，並點名力捧。
問到江若琳夏日消暑妙法？她說：「食冰同雪條，我最鍾意飲凍飲，好解渴，飲咗落去涼浸浸，同朋友傾偈嘅時候，我會不自覺食晒凍飲嘅冰，有時仲會食埋朋友嗰杯㖭！」她又喜歡去沙灘玩，但美中不足是皮膚天生易曬黑，所以一定不可偷懶，事前必定要做好防曬準備。
夥友享受沙灘樂
為了舒舒服服享受在沙灘嬉戲的樂趣，江若琳說：「我會選擇日落時候去，一來冇咁曬，二來我最鍾意喺沙灘玩水，因為浸落水度感覺好舒服，一班朋友約埋嚟玩，真係好開心。」
採訪：比華利 攝影：仇志德
髮型：WillieofIISalon 化妝：諺瞳小白
服裝：PrivateShop、Roxy
