賭王何鴻燊前晚與三姨太陳婉珍在灣仔欣賞舞台劇《天之驕子》，提到愛女超雲在其旗下酒店做暑期工，賭王指是女兒自發性要求，只做一個月，沒有優待，甚麼都要做，且全程冇得坐。
賭王何鴻燊前晚偕三姨太陳婉珍到灣仔，欣賞鄭少秋及陳寶珠主演的舞台劇《天之驕子》，賭王大讚秋官戲好、是天才，他說：「佢演乜嘢角色都吸引到我。」
盼將來可幫手
問賭王與三姨太所生的大女超雲在其旗下的酒店做暑期工，賭王說：「係個女自發性提出話要做嘅，後生女應該學啲嘢，都係做一個月啫，當佢係練習生㗎咋，希望佢畀啲心機啦。佢乜都要做，要着制服、冇得坐，希望佢將來讀書有成，返嚟幫我手啦。」
賭王又說：「我細個屋企好窮，13歲就要攞獎學金讀書，我成日講，財富未必跟人一生，但係學問就會啦，我都係識咁多嘢先坐到今日個位，我讀大學時因為冇錢，女仔都唔敢追，有幾個靚女約我去街，我就係因為冇錢，所以借尿遁。」
一向知慳識儉
問三姨太女兒做暑期工一事，她說：「都唔知有冇糧出㗎，就算有極其量都係幾千蚊，不過個女好乖，有儲錢習慣，有10蚊佢都會儲起六蚊，況且吸收吓工作經驗對佢第日升大學或者將來嘅路都有幫助，佢主修商業同法律，副修時裝，佢讀乜嘢我都支持佢。」此外，昨日超雲陪同賭王到上水出席禁毒活動，同場有禁毒大使薛凱琪表演助興。
採訪、攝影：KennethCheung
