胡杏兒近日增肥至150磅拍攝《肥田喜事》，稍後要減肥拍攝講述暴肥前的戲份，故成為纖體公司的爭奪目標，杏兒表示至今尚未落筆簽約，但強調絕不搵命搏食藥減肥，不過就希望減肥後身材變得玲瓏浮凸。
胡杏兒、鄧麗欣（Stephy）及陳敏之昨日出席在香港仔中心商場舉行的金牌女兒紅簽唱會，三人現場獻唱之餘，更在台上與fans玩遊戲，酷熱天氣下仍吸引大批fans到場支持，場面熱鬧。
熱至一身大汗
胡杏兒近日增肥至150磅拍攝新劇《肥田喜事》，昨日在炎熱天氣下出席戶外舉行的活動的她，不消一會已一身大汗，她說：「我以前瘦已經好怕熱，𠵱家就更易流汗。」
杏兒稍後要在個多月內減30多磅，在9月時拍攝講述暴肥前的戲份，令多間纖體公司向她展開爭奪戰，她表示至今尚未落實與任何纖體公司簽約，她說：「價錢唔係問題，最緊要係大家夾到，我本身一定唔會搵命搏食藥減肥，有朋友試過食藥減肥，體重反彈得好快。我𠵱家上、中、下圍都升晒級，我希望減完肥，身材會好過以前，我以前淨係得個瘦字，希望到時可以應大則大，應細則細囉！」
望可再度拍劇
Stephy就表示希望有機會再次拍劇，問她可會接受為角色增磅，她說：「我都好恨好似胡杏兒咁可以奉旨食嘢，聽佢講夜晚臨瞓前不停食雪糕，真係羨慕，不過我會驚減唔番囉！」
採訪：卓美娟 攝影：陳偉權
