上星期五講25.5℃，讀者有回應，一位物理學博士Alex來電郵（英文）話：「溫度固然影響我哋對『熱』嘅感覺，其他因素亦不可忘記，例如反射、空氣流動、風速、濕度、個人身體條件以及外在環境（例如身伴有位大肥佬或極度性感女郎），不可一概而論。我哋調校空調，要用腦及視乎環境──政府都一樣。」
呢位A博士都幾幽默，請你不如寫封電郵畀廖局長，叫佢唔好硬性規定政府辦公室嘅夏天氣溫喺二十五點五度，要用吓腦。另一位馮先生來郵話：「二十五點五度係根據美國冷、熱、空調工程師學會及英國特許建築服務工程師學會嘅提議而訂下嘅。工程師認為二十五點五度係空調嘅舒適地帶（comfortzone），但只限於一般性用途，手術室、室內運動場便不適用。而且，風速、風量、空氣質素、風的分布、濕度等等都會影響溫度。」
科學解釋有嘞，證實25.5℃只係指示，並非鐵律。中央圖書館內要用座地風扇（經濟日報有圖為證），就係標準官僚作風，因為館長唔敢違反政府指令也。港大圖書館館長就用腦，將氣溫訂喺二十二度，因為空氣潮濕，溫度高會容易導致藏書腐爛。中央圖書館及一啲政府部門一邊遵從二十五點五度，一邊買入風扇為辦公嘅公僕解困，使唔使用電呀？咁樣叫做環保，直情係笑話。
政府唔用腦，大家無謂跟風一齊癲，一於照A博士咁講，自己用腦去調校空調溫度。香港啲空調工程師其實要負上好大責任。任何一個辦公室嘅空調系統，總有一啲死角位，冷氣唔到，熱死人，但坐近風口嘅老友就凍到要着冷衫，你話要將就邊個吖。香港嘅空調工程人員用多啲腦，相信就唔會令到辦公室內經常為冷氣爭吵。左丁山曾坐在某工業大廈辦公室內之某封閉式房間辦公，日日凍到震要開暖風機，但房間外嘅同事就話溫度啱啱好。搞成咁，人人賴空調系統設計不周，浪費能源。