「呢本書講一個女仔受感情創傷後得了精神病，令佢分裂出五種性格，面對唔同事會以唔同嘅性格去處理。我好鍾意睇啲有關心理嘅書籍，好似細個已經睇佛洛伊德（SigmundFreud）嘅書，都曾經考慮過讀心理學，而且學識唔同人嘅心理，對自己做人處世都好有幫助。有時我都會有啲精神分裂，情緒波動好大，睇心理書可以平衡番。」
應采兒揣摩人生
「係朋友介紹我睇嘅，不過之前都有留意，作者對人心靈嘅捕捉好準確，我睇完之後都覺得獲益良多。書本裏面好多值得記起同學習嘅地方，我已經用螢光筆畫低，準備隨時重溫。我覺得呢本書可以改善你嘅人生，令人變得積極同透澈。我睇嘅係英文版，相信會比繙譯本更加傳神。」
蔡卓妍啟發思考
「呢本係繙譯小說，我喺台灣時行書局買嘅，好暢銷㗎！故事講兩個由細識到大嘅男仔，自從風箏比賽之後，大家各走不同嘅路，係一個好感人嘅故事。我哋有時未必睇得晒個世界係點，睇吓書會有好多啟發。我好鍾意睇呢類型嘅書，睇完仲有空間俾你思考吓。」
吳日言發明星夢
「小時閱讀習慣唔係太濃厚，嗰時會睇漫畫多啲。到中學就睇時裝雜誌，再後期啲先會睇吓小說。而令我最深刻嘅小說，係亦舒寫嘅《印度墨》，內容講一個女仔點樣成為明星，我睇完之後真係好想做書中主角。𠵱家投身社會後，冇乜時間再閱讀，只會有時間睇吓寵物書。」
採訪、攝影：何永寧、卓寶花、王連連
