𠵱家喺奧地利進行季前集訓嘅皇家馬德里，早排公布咗06/07球季球員號碼，由於1至31號都名花有主，除非洗牌嚟過，否則新加盟嘅「小鋼炮」簡拿華路同艾馬遜應該要着大冧巴嘅波衫比賽。
皇馬公布嘅球員號碼，係由1號一直排到落31號。基本上冇乜大變動，幾個主力好似卡路士、魯爾、朗拿度同碧咸咁，仲係着3號、7號、9號同23號，但退咗休嘅施丹件5號波衫唔知點解畀咗冇乜名氣嘅魯賓，另外卡斯辛奴就搶咗活基治個冧巴，着番佢喺羅馬效力時嘅幸運18號，活基治改穿17號。查實活基治着18號傷足2年，𠵱家轉冧巴，話唔定可以幫佢轉埋運呢！
友賽勝普利茅夫1:0
值得一提嘅係，喺呢31個號碼之中，皇馬冇預留畀從祖雲達斯新加盟嘅意大利中堅簡拿華路同埋巴西防守中場艾馬遜。咁即係話，除非有球員轉會或被借走，否則佢兩個嘅冧巴會係喺32號或以上，都幾特別。
而現時正為新球季做準備嘅皇馬，前日喺奧地利約戰英冠普利茅夫。雖然係友賽，但佢哋非常重視，排出強陣，包括希古拿、活基治、古廸、巴廸斯達同卡斯辛奴等等，結果憑巴廸斯達入12碼而險勝1:0。
「講真如果係勁嘅話，着乜嘢冧巴嘅衫根本並唔重要，好似簡拿華路咁，之前喺祖雲達斯着28號波衫，咪一樣踢到曉飛，你哋話係咪先？」