前日周末下晝一點放工時間，民主黨喺中環擺檔賣獎券籌款。主席高達（李永達）（圖左二）遲咗十五分鐘先到，搞到單仲偕鬼咁擔心，不停問「佢係咪嚟㗎？」好彩遲到好過冇到。高達同八方講，民主黨預計明年支出要成872萬蚊，單靠議員上繳同其他資助，最多可得600幾萬。成二百幾萬赤字點算？高達話會賣八個星期獎券，希望籌到200萬，剩番20幾萬就靠儲備填補。
高達又乘機同八方講吓兩位政治阿太，佢話覺得葉劉「好混亂」，明明篇論文寫自己贊成2012年普選，但佢喺自己主持嘅電視節目時又話要再傾，都唔知佢係支持定反對，叫葉劉快快澄清，葉劉唔知收到未？佢又批評策發會做嘢慢，又唔理普選民意，完全係「黑箱作業」！仲話等陳太公布咗核心小組嘅方向，日後唔排除有合作機會。