公戲私用：賊王4招　玩謝影帝影后

一套《案內人》（InsideMan），囊括幾大性格演員，未計丹素華盛頓同茱廸科士打兩大影帝影后，仲有基斯杜化普林瑪、威廉德福做綠葉，加上警匪鬥智片種，電影未上畫已令人屏息期待，個個等睇丹素同科士打鬥好戲。點知喺戲內都不及一個新紮型男基夫奧雲，俾佢飾演嘅賊王點到陀陀擰！
記者：徐影龍

《雛菊》、《千里走單騎》有名氣但太悶，碟舖老闆都話呢個禮拜係《案內人》跑出，淨睇影帝影后已經值回票價啦！好可惜，戲內最威係賊王基夫奧雲，由打劫銀行到逃脫，一切都在佢掌握之內，彷彿全世界都係佢嘅棋子。在賊王部署計劃內，全部人都逃不出佢計算，只係4招足以令丹素疲於奔命、科士打費煞思量無功而還！

$130（DVD）
$49（VCD）

演技大鬥法

兩大主角挾着影帝影后牌頭出征，已叫戲迷值得期待，筆者亦係相當鍾愛呢兩位性格演員，雖然片內只得幾場交手戲，不過丹素既演活查根究底嘅警察、風趣幽默但死不讓步；科士打亦不甘示弱，飾演老練「中間人」，為錢而企圖說服丹素同賊王，面上表現出嘅智慧同自信，正正係廣大戲迷最愛佢嘅原因，始終未叫戲迷失望。
坦白講，電影橋段太過一廂情願，賊王近乎神一樣神通廣大，卻全不交代來歷及目的，任憑丹素同科士打點努力，仍難掩劇情之薄弱無力，平白浪費一堆好演員。兩大主角近年產量不多，卻一蟹不如一蟹，無復當年《紅潮風暴》、《沉默的羔羊》那些令人拍案之作。

■基夫奧雲憑《誘心人》一炮而紅，喺《案內人》戲內飾良心賊王，打劫銀行卻不殺一人。

■影帝影后幾場交手戲，都帶到舌劍唇槍嘅戲味。

■老戲骨基斯杜化普林瑪做有錢佬，為掩過往醜事而僱用科士打。

劫案天衣無縫

故事講述賊王打劫銀行，目的卻非為錢，而係保險箱內某些重要物件，誓要將之公諸於世。身為NYPD嘅丹素，為救銀行內50名人質，扭盡六壬兼身先士卒，有點似《暗戰》嘅劉青雲；而科士打則飾演幫老闆臭屎密冚嘅中間人，費盡唇舌說服丹素同賊王，希望盡快結束打劫事件。
黑人導演史碧克李本身擅長種族問題電影，以出位拍攝風格揚名，亦受當年阿爾柏仙奴嘅搶劫片《DogDayAfternoon》影響，一直渴望拍攝呢類片種，加上自家出色影像處理手法，應帶出警匪片嘅張力，可惜劇本極度不濟，3路人馬疲於奔命搞一大輪，原來只係為咗一啲同現實無關痛癢嘅陳年事情，賊王欠缺說服力嘅所謂精密布局，更係全片敗筆！可惜，可惜。