八方前日喺書展見到華叔（司徒華）戴住副黑超，原來佢早前左眼白內障，醫生吩咐佢留喺屋企休息。不過佢話喺屋企好悶，所以即使要做「黑超華」，都堅持去書展為自己本新書幫讀者簽名。華叔本新書《橙黃橘綠》好富文學性，真係碩果僅存嘅清心小品！
噚日佢又再次出動，喺書展「兒童天地」同大人細路講故事，全場座無虛席。故事係講有個皇帝要從三個兒子中選擇繼承人，聽到最後一刻，原來皇帝決定咗用普選！聽眾即刻拍晒手掌，仲齊齊舉手選咗最好嘅兒子繼承皇位，咁精明，都話香港有晒普選條件啦！呢個「三隻小豬」改良版係華叔自己創作㗎，之前仲喺草委會講過，不過橋唔怕舊吖！
八方喺星期五仲見到出版華叔本書嘅次文化堂社長彭志銘，佢話之前本《老鹹書》俾書展禁咗唔可以賣，搞到佢好鬼唔開心，其實敏感相都打晒格仔，又係香港人嘅集體回憶，莫非文化書真係冇生存空間乎？