軟硬天師昨日推出新碟《LongTimeNoSee》，二人到HMV視察唱片銷售情況，吸引過百歌迷到場。據知旺角區有唱片舖將這隻原售149元的唱片炒至199元，林海峰對此笑說：「估唔到HMV居然賣得平過旺角。」
軟硬天師自從宣布重組後，大計浪接浪，除了即將舉行一連10場演唱會外，其新大碟《LongTimeNoSee》昨日已經推出。軟硬昨午到尖沙嘴HMV巡視，吸引過百fans拿着新唱片排隊守候，加上傳媒採訪，令唱片舖擠得水洩不通。
T恤喻叉燒
據知軟硬新碟推出數小時後，旺角區有唱片舖將原本售149元的新碟炒高至199元。林海峰（Jan）得知此消息後笑說：「呢個情況真係好少有，估唔到HMV居然賣得平過旺角。」阿葛則估計新碟可炒高至一倍，他說：「當年我哋小軟硬隻碟都炒得好貴呀，我估今次呢隻最高可能炒到300幾蚊啦。」
談到日前有數十名fans投訴銅鑼灣的軟硬店舖售賣的軟硬T恤沒有新款式以及尺碼不齊，阿葛說：「呢啲咪儍囉，我已經出咗29款，賣咗成萬件，啲款仲多過猿人，我就快鑲鑽石喺棚牙度。」在旁的阿Jan則一臉認真地說：「佢哋即係投訴冇新鮮叉燒賣啫。」
練成大蛇轉
對於被拍下排舞時互不瞅睬，阿Jan在一旁煲煙看雜誌，阿葛則不時煲電話粥，阿Jan解釋：「我見到對面好多狗仔隊影呀，因為我哋練成咗風車大蛇轉同埋坦克拉帆船，所以我咪去煲煙，因為我哋有首歌叫《煲煙》，阿葛就練緊打整蠱電話。」
阿葛則指排舞不需要經常走在一起，他笑說：「我哋主力唔係排舞，𠵱家我哋問緊方榮記打邊爐有冇得外賣，過幾日嚟就影到我哋喺度打邊爐。」
採訪：李珮洳 攝影：仇志德
