大市有鑊氣，今周出擊，揀麗豐控股（1125）。
麗豐現價0.315元，較3月高位0.53元已調整41%，較今年1月以來最低價0.28元只高出10%，唔使鬼怕乜乜宏觀調控。
今日集中講麗豐兩件嘢，就係早前收購上海閘北1幅地皮及星洲嘉德置地（CapitaLand）入股。
麗新系創辦人、好鍾意食魚柳包嘅已故林伯林百欣，好有眼光，除咗透過麗豐在上海及廣州低價買地發展地產之外，亦透過麗豐嘅控股公司麗新國際（191）買入上海閘北大統路與芷江路交界蘇家巷地皮，鄰近火車站北翼，佔95%。
馬永貞劈友所在地
林伯駕鶴西去後，麗新系公司不斷重組。幾個月前，麗豐向麗國收購閘北地皮95%權益（其餘5%由上海和田城市建設及廣州1家公司擁有），條件好筍，只係發行新股5.65億股，每股作價0.40元，及支付2.26億元，餘下1.67億元，以承兌票據支付，為期4年。連同債項，麗豐所畀嘅代價，總共5.58億港元。
閘北地皮喺上世紀民國初年，係馬永貞劈友所在。年前亞洲電視有播過馬永貞英雄事迹，由何家勁飾演主角。當年屬冇乜價值爛地，今日當然唔同晒。
最新行情，宏調不斷出台，都㩒唔住閘北樓市。今年5月，閘北住宅成交量仍大增50%，市價穩俏，普通檔次賣每方呎810港元，中高檔1350至1620港元（每方米15000至18000元人民幣）。
麗豐買入嘅閘北地皮，有關文件話預計興建高檔住宅，名為「五月花生活廣場」，預算動用5.71億港元（麗豐佔95%），即總成本約11億港元。預計住宅連同商場與停車場，總面積144萬方呎，即係每方呎成本不過784元。閘北項目今年下半年動工，3年內完成。
中國宏調，估計淋唔熄上海樓市熱火，最多上海樓市升勢慢啲。閘北項目相信每方呎淨賺800港元冇乜難度，144萬方呎可賺11.52億港元，麗豐佔95%即10.9億元。
嘩，肥仔咯！麗豐市值不過20.27億元，10.9億元代表半隻麗豐市值。唔使理將來盈利分幾多期入賬令PE低到令人流口水，單係1個閘北項目，已可令每股NAV增0.17元，即係股價1半以上。
06年1月底，麗豐每股賬面NAV0.73元，因為發行新股畀麗國，攤薄到0.67元。閘北項目大賺10億元以上，上海淮海中路嘅香港廣場增值，上海長寧區凱欣豪園大豐收，廣州五月花商業廣場增值，計計埋埋，麗豐每股實際NAV，估計唔會低過0.95元。現價P/B僅0.33倍，熱門嘅國內地產股，冇邊隻夠佢低。
再講吓嘉德置地單嘢。
嘉德最近完成購入麗豐16.10億股新股，每股作價0.40元，總共斥資6.44億元，佔現有股本25%，做第2大股東。大股東麗國，揸麗豐50.73%。
淡馬錫揸合生賺兩倍
嘉德除咗做大股東外，亦直接同麗豐合作，年初以1.028億元人民幣入股麗豐旗下Beautiwin公司50%，聯手發展廣州白雲區住宅項目，明年推出首期發售。嘉德大股東係淡馬錫，淡馬錫係新加坡政府嘅投資檔口，市值556億港元，係星洲最大上市地產公司，大過信和置業（083）與新世界發展（017），係麗豐（市值20.28億元）嘅27倍。將來雙方有加強合作，舢舨仔泊大船，將來梗有着數。
咁，嘉德嘅大股東淡馬錫投資股票眼光如何？有辦你睇。去年8月，淡馬錫以每股4.875元買入合生創展（754）1.003億股，合生現價15.70元，升幅222%，淡馬錫未賣過。淡馬錫透過嘉德揸麗豐，你估會唔會長期坐艇？
國內搞緊宏調，正係低買麗控好時機。麗控升到嘉德嘅家鄉價0.40元，現價0.315元上車執27%。嘉德要賺30%，股價見0.52元，散戶現在買入，執65%。
講多兩句，上月21日生效，嘉德委派咗位代表進入麗豐董事局。
高彰坡