生於聖誕節，加上族譜排「瑜」字輩，邵聖瑜因而得名，大抵家人也希望這個女孩子長大能夠得到普天的快樂。活在當下，擁有幸福家庭及於法國殿堂品牌香奈兒（Chanel）度過了她的黃金十年，邵聖瑜滿足地表示已尋找到快樂平衡點，對她而言，家庭永遠是最後的幸福堡壘，所謂的女強人目標早於為人母後已拋諸腦後。 撰文：梁錦雯
法國國寶施丹以一記頭槌結束他的足球生涯，卻同時令全球球迷更加愛惜這個法國球王。邵逸夫姪孫女邵聖瑜（Claudia）在人生道路上，也是與法國結下一個浪漫的情意結，嫁予法籍夫婿GuyD'Auriol，生了三個擁有法國血統的小孩子；事業上，曾在法國頂級名牌卡地亞、Celine分別工作了三年，至今在殿堂品牌Chanel出任顧問及chiefbuyer等要職，今年更步入第十個年頭，別具意義。
甘為子女犧牲
問邵聖瑜在Chanel度過了她的黃金十年，是否感觸良多？她說：「我係山羊座，可以好忠心，加上我又好鍾意呢個品牌，初初冇諗過做咁耐，但係如果對佢（Chanel）冇感覺，都唔可能留咁耐。呢度好似一個大家庭，自己又好有經驗，完全掌握到，如果仲係20、30歲我可能會轉工，呢度已經係oneofthetopbrand（頂級名牌之一），冇嘢可以高得過Chanel，所以根本冇需要轉。如果有一日我唔喺度做，我諗我最想係返學校學藝術、畫畫同烹飪。」
擁有高貴漂亮面孔的邵聖瑜同時有着一派女強人風範，現實生活中她與普天下的妻子、母親一樣，同時要面對家庭與事業兩難的局面，她說：「未生囡囡時，自己諗一定要做一個女強人，但係生咗個女，所有諗法都改變，仔女係我最大、排行最先嘅責任，一定要犧牲。好彩丈夫冇畀壓力我，呢一樣我好欣賞佢，加上仔女大得好快，我做咗一個決定，千祈唔要做大老闆，因為要由朝早做到夜晚十一點，我要嘅係彈性，所以我寧願以兼職形式合作做顧問，唔想畀晒啲時間公司。」
坦然面對衰老
邵聖瑜續說：「當然平衡係最重要，起初都覺得好困難，成日覺得時間唔夠用，所以一定要學會sayno，有時真係做唔到就要講，唔係你會好攰。」她兼顧家庭及工作最大的犧牲是近乎沒有私人時間，她說：「有時想做運動或者同老公出街食餐飯嘅時間都冇，真真正正屬於自己嘅時間可能係整緊頭髮，或者一年去六次巴黎公幹，夜晚喺酒店休息時嘅時間。」沒有私人時間，取而代之是與家人子女共度的家庭樂時間，她說：「我最開心每逢周未成家人出海遊船河，因為我實在太鍾意曬太陽。」
近年除非是Chanel的活動，否則已甚少見邵聖瑜的芳蹤，她說：「去咗咁多年party，都係見同一班人、做同一樣嘢，除非有一個好好嘅理由，否則我寧願同屋企人、好朋友一齊食餐晚飯。」
不少踏入30、步向40歲的名模、名媛紛紛一窩蜂投入注射肉毒桿菌（Botox）、整容陣營，擁有中國、奧地利血統，生得一副美人胚子的邵聖瑜會否有中年危機？她笑說：「可能已經過咗、或者未有過啩，年老係冇辦法，係人都會，個個人都會驚驚哋，跟住就會有壓力，我自己只會諗，哦！又老咗一年，又多咗少少皺紋啫，不過冇辦法啦，既然我唔想開刀，就要自然面對。」
深明知足常樂
她續說：「總之我會同自己講：『自己身體好，細路個個都OK，老公又好又錫我，我仲想要啲乜嘢？』，做人要知足，唔好太苛求，你要清楚知道邊樣嘢對你重要啲，要健康定外貌？要開心定有錢？永遠都會有人有錢過你、靚過你、聰明過你，都有人會比你少啲錢、冇你咁幸福，點可以成日拎嚟比較？」
攝影：陳慧安
場地：Chanel（太子大廈）
