世界任何角落都見到雞的蹤迹，不少民族會因宗教不吃豬牛羊，但似乎不會不吃雞。的確，雞並非甚麼貴價食材，雞肋，一般人更會覺得食之無味，棄之可惜，但只要你識食，雞全身皆美味，雞肋旁邊肉，更是矜貴的美味。
記者：張一豪
攝影：譚盈傑
模特兒：Pinky（LB）
雞中鮑魚海南雞$88
每隻雞只有六小塊雞中鮑魚，要用三隻雞才可做到一客刁鑽版海南雞，因為要選擇部位，所以每晚只可在7:00pm後供應10客。
雞肋都係寶
帶Pinky到「大巴窰」喫雞，口花花林老闆見靚女即說：「Pinky你唔只唔係雞肋，更加係雞肋旁邊肉。」Pinky滿腦問號，「雞肋旁邊肉」？是褒是貶？林老闆解釋：「包住雞肋旁邊嗰兩塊薄肉、髀位同股位之間嘅兩塊爽肉，同埋股骨外側兩塊好似魚面珠咁滑嘅嫩肉，呢三個部份爽滑彈牙，有『雞中鮑魚』之稱。話你係雞肋旁邊肉，即係讚你索咁解呀。」他對食材堅持，海南雞飯非用新鮮雞不可，不用冰鮮貨，如果供應情況許可，更會用質素更佳的本地雞：「新鮮雞日日劏固然係質素保證，但都要加埋秘製醃法先保留到雞味，整到啱啱熟至起呢幾塊肉出嚟，最後配埋華姐嘅秘製醬料，咁就一百分嘞。計我話，雞每部份都係寶，除咗用最好嘅部份做雞飯之外，剩低嘅雞肋骨、雞殼都會用嚟熬湯，咁啲例湯先會鮮甜。」這當然了，最平凡的材料，只要細心與堅持，也可成為一碟極品，絕不會食之無味。
a.豬頸肉雜菜卷5件$32
用醃好的薄片豬頸肉捲住椰菜、紅蘿蔔絲等雜菜炸至僅熟，因雜菜吸收了油份，令豬頸肉清爽可口不油膩。
b.酥炸雞柳芝士條兩件$28
用生長90日的新鮮雞做食材，因此雞柳肉質嫩滑，配上特製濃香的芝士跟清香的芹菜，表面上粉漿再炸，皮脆肉滑隱隱有芹香，下午茶2:00pm至6:00pm供應。
c.鮮雞雜串燒兩串$24
用生劏鮮雞剩下來的腎和肝串成，用華姐特別調配的香料去醃，燒出來陣陣肉香。不過因為用鮮貨，故只可在2:00pm至6:00pm下午茶時段限量供應。
d.雞中鮑魚海南雞飯套餐$58
同樣取雞中鮑魚部份，因為是套餐，連雜菜、油飯、例湯，所以雞肉份量少點。
解 說
曹操派夏侯淵駐守漢中，陽平關一戰，劉備大勝殺死夏侯淵，曹操親率大軍援助漢中，但與劉備多次交戰均不能取勝，最後決定不與劉備在此相持，但又心有不甘，於是便下了一個只有兩個字的軍令──雞肋。眾將不解，只有楊修聽得明軍令收拾行裝，眾將問他：「你怎麼知道主公要撤兵？」楊修說：「雞肋，食之無肉，棄之可惜，曹公用雞肋比喻漢中，所以我知道要撤兵了。」最後曹軍果然撤出漢中，不過楊修因屢次看穿曹操心意，最後招至殺身之禍。
食客有Say
Bon：「入口好嫩，食得出雞鮮味，應該係用新鮮雞。原來係雞肋側邊啲肉嚟㗎，唔講唔知喎。」
Mabel：「好滑，入味，送油飯最正，雞肋？係咪即係胸骨呀？阿媽好多時都用嚟煲湯嗰啲呀？」
Sylvia：「肉厚薄適中有口感，不過我覺得比新加坡食到嘅鹹少少。雞肋？雞肋唔係無用嘅咩？」
搵食攻略
大巴窰（35211912）
地址：旺角朗豪坊L4AFoodcourt5號舖
營業時間：周一至周日11:30am-11:00pm
交通：地鐵站C朗豪坊出口
座位：200個（美食廣場） 人均消費：$50-$70
最好賣：海南雞飯，雞是鮮雞做，特別鮮味，
海鮮喇沙無論湯底跟材料都特別出色