沈殿霞（肥姐）同吳家樂噚日主持遊戲節目《15/16》，無綫劇集《愛情全保》演員陳錦鴻、吳美珩同李亞男擔任嘉賓。首次主持呢個節目嘅肥姐罕有地獲安排有得坐，佢話十幾年前尾龍骨斷過，所以𠵱家唔可以長時間企喺度，佢話：「工作人員好好，我冇出聲都安排座位畀我，所以你哋見我出入機場都坐輪椅，其實係行得耐會標冷汗。」