「《死亡筆記》呢本漫畫係講其中一個死神將一本我哋所講嘅生死冊拋咗入人間，之後就俾一個學生執咗。初時個學生就想利用本生死冊殺咗壞人，之後就有人去偵查呢件事。我覺得呢本漫畫好睇之處係要你去思考，而且佢嘅情節好緊張，有時出咗新一期，我都要拎番之前一期重溫番先可以追落去。」
許志安唱好老莊
「好多種書我都睇，最近就鍾意睇吓老子、莊子嗰啲書，因為我首歌《大愛》入面講咗一啲有關佛理、道德嘅嘢，林夕有睇呢啲書，佢都叫我睇吓。睇咗呢啲書，唱歌嘅時候明白歌詞入面所講嘅意思，知道吓啲道理，咪可以唱得投入啲囉！」
陳偉霆雞湯減壓
「呢本書係家姐畀我睇嘅，因為入咗行之後冇時間行書局，而且佢覺得我入行壓力大咗好多，所以特登畀呢本書我睇，諗住可以令我心境平靜啲。本書係叫人唔好將啲事情睇得太重，等個心負荷唔好咁大，應該識得放鬆同享受吓人生。」
鈴木仁細味成長
「我好鍾意睇書，唔同類型嘅書都會睇，小說或者係名人自傳都鍾意，《挪威的森林》係我最近啱啱睇完嘅書，書裏面描寫由細路仔轉變至大人嘅階段，由孤獨嘅感覺至搵到戀愛，呢本書係一本關於青春嘅小說，不過描寫嘅人物同關係都好細膩。」
採訪、攝影：駱華齡
