暑期出外走一走，真係醒神好多。不過，帶有工作性質嘅旅行又唔同感受喇，好似港區人大同政協委員咁，每年暑假都要揀個國內地方做考察，睇睇當地情況之後，就要提交報告，所以唔係淨係遊山玩水咁簡單。
今年人大同政協兩邊都係21號出發，人大團會去安徽同黃山，28號返，人腳有飛哥同阿謙等，飛哥會同埋老婆去，今次係佢第二次去黃山玩，上次就冬天去。
政協就去天津同唐山，日子短啲啲，26號就返，所以成員之一嘅阿譚就話，前後兩日來回都去咗，所以真正考察都係得四日。四日咋，唔係好多，所以相信個團都幾趕，但可以去唐山呢啲咁有歷史意義嘅地方，真係辛苦都抵。
棠哥都有份去考察，佢話自己已經好多次無去，有人大仲笑笑口話，佢再唔參加就踢走佢，所以嚇到棠哥今次乖乖跟大隊一齊去囉。