豪門恩怨幾時都係普羅大眾最鍾意「八」嘅，引人入勝程度，真係非女星鬥袒胸露臂博上封面所及！繼賭神兄妹擘面互插之後，呢期城中最熱爆嘅，莫過於一宗因為「賣玩具」而引發出嚟嘅「家事」，𠵱家大家最想知道就係，究竟奇女子最後可唔可以用眼淚攻陷富豪男朋友個心，繼而入宮做正印。
話說男朋友先一個月頗頭痕，皆因個寶貝細仔想換過件「玩具」，但唔知點解將個拍賣過程玩大咗，搞到一眾叔伯uncle唔係好高興，但礙於個仔真係唔想佢插手，於是為人父嘅佢，惟有響幕後默默發功將件事擺平，幸好最後開出嚟嘅結局，雖然有手尾跟，但都叫大家落到台。
不過咁，佢女朋友奇女子就認為，寶貝細仔係趁呢單嘢曲線攞咗老竇一筆。與此同時，寶貝大仔同老婆卒之證實咗大家嘅染色體無問題，博到粒「慈姑椗」，眼見男朋友屋企人口越嚟越多，份身家又俾人食咗一截，加埋男朋友先嗰排又響公眾面前話唔排除再娶，於是等入宮等咗好多年嘅佢，就加多兩錢肉緊扭計，為嘅只係趁男朋友仲身壯力健嘅時候盡快入門。
想賣寶號timing唔啱
咁點扭計法？平常百姓女子最強嘅絕技「一哭二鬧」之類佢都有出，但更強嘅係佢諗住將男朋友打本畀佢間寶號私有化，而且仲要響寶貝細仔玩緊大拍賣嗰排，掟呢個「建議」出嚟，但可惜，timing唔啱，呢個建議好快俾人拒絕咗。至於邊個咁夠膽說「不」，中環金融圈有個講法，話係有份「揸住」奇女子間寶號、唔係淨係識得生BB嘅大仔囉！
最新進展係點？有人話男朋友已經暫時冧掂奇女子，但奇女子仍然堅持要入門，至於兩個少爺仔呢？好話唔好聽，幾有錢都好，其實個諗法咪又係好似平常人咁。第一，媽媽只可以有一個；第二，老頭子都幾十歲就咪搞咁多嘢啦，尤其係搵個同佢哋差唔多年紀嘅女人做後母！