無綫節目《美女廚房》收視最高曾攀升到40點（約257萬觀眾收看），這是周日節目的異數。
多得薛凱琪煮鴨太臭，多得官恩娜用水炸蝦，也多得主持們食完會嘔，真是愈難食愈好睇。
有美女、有廚房，從來沒有人說這個節目是有美食的，因為那根本就是個搞笑節目。
鄭中基、梁漢文及方力申三位雄心勃勃的戇男子齊集廚房，也不會說甚麼主持心得，因為我們只想聽揀女秘笈。
三位男士一致認為：揀老婆一定要識煮飯，苦瓜乾姐姐、火龍果衰女和辣椒仔妹妹，千祈千祈咪黐上身！ 撰文：蔡如玉
男人傾心事，通常摸住酒杯底，站在廚房講女人的，應該叫做與時並進吧。女人不懂下廚會被扣幾分？最鍾意及最討厭女人類型，可以用甚麼食物來形容？對女人、對人生及對食的態度又是甚麼？以下答案由《美女廚房》三位主持提供！
（梁：梁漢文方：方力申鄭：鄭中基）
梁：其實煮嘢食，我一啲都唔識，阿媽從來唔畀我入廚房，搞到𠵱家我最叻係煮公仔麵。所以老婆梗係識煮飯嘅好，出得街多都想喺屋企食，女人唔識嗰啲要扣20分。
要鍾意食肉
方：公仔麵煮得好食都唔容易㗎，我就跟過媽咪包水餃，最叻都係炒冷飯，我媽咪最怕我識煮餸，怕將來乜都係我煮畀老婆食喎，所以女仔識煮飯好重要，但我已經喺唔願意嘅情況下降低要求，唔識煮嗰啲我都扣20分。不過我以前煮過牛扒畀女仔食，呢樣可以由我負責。
鄭：20分少得滯，扣40分啦，阿方媽媽真係有見地，我識煮都唔可以成日我煮晒啦，開頭唔識可以學，唔通喺屋企家爺仔乸日日都要食菲傭煮菲律賓餸咩？日日出街食都死，成身味精，所以老婆一定要識煮飯。
方：我第時個老婆呢，識煮飯仲要鍾意食肉嘅，我咁鍾意食媽咪啲水餃，大家一齊食開心啲，女人應該好似水餃咁餡多又靚。
鄭：漢堡包都好多餡好好食，但如果好似漢堡包咁積埋太多嘢喺個心度就弊傢伙，女人最好直到碌蔗咁，唔係話身材，意思係有嗰樣講嗰樣，唔好積住積住出問題。
拍拖似煎魚
方：阿鄭生，我係話內涵個涵呀。
梁：梗係講嘢好過唔講嘢，太文靜冇嘢講好難溝通，唔聲唔聲好似苦瓜乾咁就慘，我最怕食苦瓜，都係活潑開朗型，有啲生氣好啲，好似生猛海鮮。
方：女仔好嘈好難頂㗎喎，我就唔得，加埋唔孝順又冇禮貌，成條辣椒仔咁就死，我咁腍，好易冇碇企。
梁：生猛過頭多嘴得滯梗唔好，不過大啲你就明，男人有時係要選擇性失聰。
鄭：最衰嗰種女仔應該係好假扮晒嘢，明明肚餓又扮細食，點菜又專叫啲貴夾唔飽，成嚿火龍果咁，係生果嘅敗類，價錢又貴，冇味冇口感，真係要嚟把鬼。唉，你揀人，人揀你，女人嚟講呢，食到就食，食唔到就算，千祈唔好夾硬嚟。
梁：咁我好堅持，我鍾意食東星斑，就唔想食其他魚，拍拖同煎魚一樣咋嘛，要細心啲，關心對方多啲，好似煎魚咁要睇實，適當時候反轉佢，免得煎得太燶或者甩皮甩骨散晒，不過我同𠵱家女友都唔係太黐身嘅人，所以似蒸魚多啲，大家都多啲空間。
鄭：喂，我好叻蒸魚，得閒研究吓。
方：有空間咪好囉，咁先長久，仲要花啲時間互相了解互相尊重，好似整竹筒飯咁，啲飯唔可以冇咗竹筒，竹筒冇咗啲飯又唔成一個餸，塞太多飯入去又唔得，塞實晒唔好味㗎。
菊花喻人生
鄭：即係唔好夾硬嚟囉，都係隨緣啦，除咗對女人，我做人同食嘢態度都係好隨緣，講食嘢，我要求唔高，幾乎食得都擺入口，有次喺內地拍戲，幾樣餸撈埋啲冷飯，惟有加啲熱湯入去，整多磚腐乳攪勻食，諗番都似餿水，肚餓都要吞。我份人呢，好又一餐唔好又一餐，有乜食乜，都幾逆來順受，人生就係咁，好多人飯都冇得食㗎。
方：我嘅人生就要似菊花咁璀璨，腳踏實地兼要循序漸進，仲要多元化，好似菊花咁多用途，可以裝飾啦，又可以沖茶清熱氣，做甜品都得。如果我喺演藝事業上可以贏得別人嘅尊重……好似菊花咁就好喇。
梁：做人當然係要有計劃逐步嚟，要爭取嘅盡量爭取，我唔會坐喺度等人煮埋嚟先食，好似食飯咁，通常會諗定食乜先出門，唔會落到街先算，不過偶爾自己唔知去邊等人帶，有少少神秘感都幾過癮。
鄭：哈哈，人生都講埋，愈講愈嚴肅，美女廚房，食咗先講啦。𠵱家點吹都冇用，世事難料，聽日嗰餐有乜好嘢食都未知啦。
攝影：陳順禎 協力：王連連
