蘇玉華vs薛凱琪
節目愈做愈旺，已決定添食四集，總共17集，聽說最後幾集會反過來由三位主持下廚煮幾味給美女們品嚐，到時會不會被盡情奚落？不管了，反正Twins還未上節目，梁漢文女友Karen也未亮相，吃過那麼多美女的手藝，三位主持先就已播出的七集來個去到盡小總結。
鄭：我好想講我哋做節目唔係特登寸人，有時啲嘢真係好難食，我哋畀嘅反應都係真心㗎。我覺得咁多集嘅嘉賓，蘇玉華煮得最好食，連師傅都讚，大家都畀滿分。
梁：我諗都好難有女嘉賓超越佢，薛凱琪都冇乜人超越到，佢煮個西檸鴨真係好臭，我當時係自然反應真心嘔，我知佢第一次入廚，一個女仔煮嘢畀人食，得到咁嘅反應其實好hurt，所以我要同佢講唔好意思，真係唔係有心。
鄭：蘇玉華爆燈堅，薛凱琪就爆燈流，佢整個鴨嘅味道你喺呢世都唔想再記得番嘅，好彩佢仲後生，大把時間學。
方：我覺得郭羨妮煮嘅都幾好食，佢又整得有紋有路，最緊要煮完會執廚房，好有家庭主婦feel。我向來都畀得好高分，連Yumiko冇蝦嘅「蔗豬」都敢食，但官恩娜個水浸蔗蝦真係好難食，係唯一我唔敢食嘅。
鄭：我想同傅穎講唔好意思，佢煮嘢都幾好食，但對手太強，所以我冇畀十分佢，大家同公司好似好衰咁，不過都證明我哋冇偏私。
方：其實上得節目，冇人真係會嬲。
鄭：有個冇上節目嘅，我都打電話去同佢saysorry，就係Paco（黃柏高），啲龍鬚糖真係太似佢個頭，哈哈，佢冇嬲，佢話OK喎。