鏡頭內外 卿姐係艾曼妞?! - 李八方

  鏡頭內外 卿姐係艾曼妞?! - 李八方

出咗本新書《卿本佳人》嘅卿姐(劉慧卿),噚日喺書展為讀者簽名,廿幾年死黨毛毛(毛孟靜)現身支持。卿姐話佢好緊張本處女作,為咗可以趕喺書展賣,佢用咗個幾月時間不停趕工。八方話佢知唔少行家都睇過本書,佢即刻鬼咁開心。
卿姐唔單止着到靚一靚,心情仲勁靚,見到毛毛即刻雞啄唔斷。毛毛喺卿姐面前,大爆佢曾經有個花名,叫做「艾曼妞」,卿姐尷尷尬尬咁話個名好色情,不過毛毛即時同八方解釋,話呢個名係卿姐洋名「Emily」嘅諧音,叫大家唔好心邪!
毛毛有客串喺卿姐本書裏面撰文,仲話曾經諗過大爆卿姐同其他人嘅感情,不過卿姐鍾意「隱藏感情」,所以有機會留番下集先講!卿姐聽到淨係識笑,仲笑笑口話「有時間都用晒嚟睇立法會文件啦!」卿姐咁有魅力,唔少男「粉絲」排隊等佢簽名,點會冇狂蜂浪蝶?