昨日大市悶到暈，全日成交只得200億銀。
不過，經紀黃提醒小初，個市雖然靜，但呢排外資大行紛紛出報告推介澳門概念股，而個別股份現價較高位回落幅度頗大，有留意價值，一旦大市全面轉旺，澳門概念股隨時再炒到飛起。
其中今年初曾批股，並曾炒上至7.30元高位的豐德麗（571），昨日獲瑞信納入研究範圍，一開波就話目標價睇8.73元，認真唔講得笑。瑞信仲話，豐德麗喺亞洲電影娛樂市場做得好掂，同濠江發展相輔相成，相比其他濠賭股，豐德麗的地產發展項目已踏入收成期，不但唔使投入資金，反而有現金流入，比起其他濠賭股優勝。
經大行品題後，豐德麗升4.67％，收5.60元，成交股數712萬股，金額3969萬元，開始有鑊氣。
另外，由大廚主理的招商廸辰（632）昨日復牌，公司去山西投資煤炭業，但對股價刺激不大，收4.20元，升唔夠1％。
慕容小初