祖記係超市定係旅遊區商場？巴塞剛從來季要角逐意乙嘅祖雲達斯身上，買入森保達同杜林，嚟填補後防嘅不足；加上皇馬喺祖記買咗簡拿華路同艾馬遜，相信呢個逃亡潮陸續有嚟。但4條友仔加埋嘅轉會費，竟然有成3,800萬歐元（約3億7,400萬港元）之多，究竟祖記係賤價超市，定係專搵旅客笨嘅旅遊區商場？
巴塞合共以1,900萬歐元買入森保達同杜林，對球隊嘅防線的確有利無害，但係杜林都成34歲，隨時收山，咁都要用500萬歐元好似唔多化算，話晒𠵱家祖記降班，好似就快執笠嘅舖頭都係大平賣㗎啦，點會愈賣愈貴呀！
韋拉伊巴等住走佬
如果加埋祖記之前賣畀皇馬嘅簡拿華路同艾馬遜賺嘅2,000歐元，原來第一浪逃亡潮已經為「老婦人」帶來3,800萬歐元收入，真係好過去搶！老實講，祖記唔降班，佢哋未必會放人，但呢4條友仔就肯定賣唔到呢個價，好似32歲嘅「小鋼炮」，假波案發生前，佢同艾馬遜嘅市價都係約800萬歐元左右，但喺大跌價嘅情況下，兩人加埋嘅價值仲勁過之前，祖記認真好嘢。
祖記𠵱家仲有韋拉、查斯古特同伊巴謙莫域等球員等緊招手，相信逃亡潮唔會就此結束，且看其他忠心隊員會否因而心郁郁好過啦。
「全世界都以為祖記係擺明俾人掠嘅賤價超市，點知左傳右傳，加埋車路士入嚟搞亂個市，𠵱家真係唔知祖記俾人搵笨，定係佢哋搵咗啲買家笨喇？」