我哋個特首去咗新加坡幾日，佢同當地傳媒話係自己主動想去，睇吓人哋點樣喺民間度吸納政治人才之類之類。廢話。
係人都知新加坡同香港爭緊，而且仲有好多嘢叻過我哋，咁曾特首咁「謙虛」咁講嘢為乜呢？做乜要揀喺咁嘅時間呢？要知道，從政者都要學吓擇日，即係睇通對手嘅行程然後決定自己點出招。
如果你要學嘅，使唔使去新加坡？點解你唔請教葉劉呢？話晒Stanford喎。佢新近搞咗個Stanford校友乜乜庫，你唔問佢即係捨近而求遠。
呢頭葉劉話要搞乜乜庫，嗰邊陳太又話要搞個乜乜會去研究研究。講真，捉緊棋啫，雖然兩個阿太都係雷聲大雨點小，但係至少睇到佢哋一步一步咁迫緊埋身。
仲有就係唐英年講「萬稅」，咁多嘢，都係去新加坡好啲。
係，新加坡有好多好嘢學，例如新加坡如果有超過五個人一齊出街，有人唔順眼報警，咁警方已經可以捉你問話。
獨裁現代化
如果香港可以咁你話幾好，仲點會有7.1遊行。
仲有就係新加坡法律規定，凡係超過四個人一齊為同一目的做同一件嘢，未經批准嘅就已經係「非法集會」。
獨裁現代化，特首梗係想學。
去新加坡仲有個好處：求李先生向阿爺講句好話，因為SirDonald知道阿爺聽李先生多過信自己。所以一定要扮學生，見到老師必恭必敬，講到明要學嘢。
鄧小平都去過新加坡見李先生，你又去見李先生，咁即係政治上嘅飄飄然：食咗政治丸仔。
如果李先生讚吓自己，都勝過自己香港嘅民望。
一切都係為連任。
我諗李先生睇穿你心意，所以你冇得飲肉骨茶。
我唔信鄧小平要飲肉骨茶而外交部話佢知人哋唔開門。因為鄧小平唔會咁蠢。
如果冇得飲佢又會唔會係都要飲呢？
有意無意玩咗你，呢啲咪要學囉。
觀火