食物環境衞生署署長梁永立噚日返埋最後一日工就開始退休前休假，正式告別官場，歎世界去也，服務咗政府37年嘅梁署長話暫時唔會做咩住，因為政府對退休公僕從事外間工作管得好嚴，都係諗住休息吓先，八方都知食環署呢個位其實認真唔易做，牛、豬、雞、魚、菜乜都關事，追小販又有佢份，梁永立話咁耐以嚟最辛苦係上年爆孔雀石綠，日日由朝做到晚；而當日小販走鬼溺斃，就令佢最難忘。
梁署長又講，第日唔使返工唔會唔慣，因為返工就話唔慣啫，放假真係邊個唔想，加上佢係超級電視迷，放假肯定唔會悶，佢噚日同一班傳媒行家食飯，就話平日放工會追睇《神雕俠侶》，仲同TVB嘅行家投訴套劇剪輯得太犀利，孫婆婆無理由第一集就出場咁話。佢一睇完就會即刻轉台去亞視睇《大清後宮》，講到津津有味。