不少老牌時裝其實好睇唔好食，之前傳過Lanvin執笠N次，連台灣富婆入主後都依然有傳Lanvin生意見紅，主帥AlberElbaz的才華毋庸置疑，仍然不能讓品牌見起色；其次GucciGroup旗下的McQueen、Balenciaga及StellaMcCartney都唔見得出色（指生意額方面）。呢啲設計師個個時裝武功蓋世，咪一樣叫好不叫座，歸根究柢咪就係大牌都要靠大賣手袋配飾賺錢；件件上千過萬的天橋華衣，凡間民女得個睇字就得，你估世間有幾多個KateMoss或ParisHilton？
以為最快宣布執笠的Lanvin到呢一刻仲依然頂得住，反而唔聲唔聲另一老牌Rochas前日就公告玩完，有如仙女下凡般的Rochas，得到時裝神童OlivierTheyskens入主回春後，一直得到唔少荷李活紅星眷顧，屬紅地氈常客，弊在實在太過不吃人間煙火，整個系列淨係靠衣衫支撐，無配飾無手袋呢停搵食架生拉上補下，弱質纖纖睇個勢都唔捱得幾耐，背後灌水的財團P&G（即係SKII等一大拃護膚大牌背後嗰個）根本邊識搞時裝，再死多幾成，所以Rochas拜拜的消息傳出後，時裝圈的反應平靜，反而對時裝神童去向就好有興趣，各大時裝老牌，舵手人選名單又添一名嘞喂！
