恒生大班柯清輝柯大俠真係大面，噚日居然請得到深居簡出嘅思捷環球幫主邢李㷧，到恒生開壇，同班攞到恒生獎學金嘅學生面授機宜。邢幫主一開波就問知唔知個社會要大家讀咁多書為乜？咪係為咗培養大家成為一個納稅人囉！養到自己之餘又養埋啲老人家！
佢仲叫啲學生，第時畢業後千祈唔好以為自己好掂，做人要虛心，留意一吓身邊嘅人同物，好好學習一吓，佢就係用呢個方法去令自己成長；同埋又唔好因為讀完大學，令到眼光變得狹隘，唔敢承受風險。佢又話自己好似佢哋咁細嘅時候好簡單，志願係食得飽。
邢幫主仲自爆佢個大女邢嘉倩，噚日收到港大嘅信，話已收佢做學生。佢話當年由於無張沙紙傍身，俾自卑感折磨咗20幾年！到𠵱家先敢講嘢大聲啲。其實𠵱家邢幫主嘅工作大部份已下放畀其他人做，大有條件考慮一吓同囡囡一齊返學，彌補以前無做嘅嘢！