【本報訊】在「黃金大道」尖沙嘴寶勒巷一帶押運金飾超過10年的張仕榮，提起較早前有行家被賊人斬傷搶劫一案，他說：「當時聽到新聞，個心當堂打個突，呢行幾乎日日都有貨要出街，真係唔知幾時會輪到自己，所以每次出貨時一定要小心，大件貨（高價值首飾）盡量分開帶。」
搶匪心狠手辣
從事打金行業逾30年的張仕榮表示，由於打金工場都是幫附近的珠寶店加工首飾，若是幫大珠寶行加工大件貨，珠寶行都會將貨交給押運公司護送，保安措施做到足；但一般的幾十萬貨，因押運費貴，所以都是由打金工場職員交收，雖然所有首飾都已買保險，但賊人作案時都是心狠手辣，先傷人再搶劫；他又說：「雖然老細每次交貨都講命仔緊要，有人搶唔好反抗，但係𠵱家啲賊搶嘢好狼，會先斬後搶，真係好得人驚。」
講到帶貨心得，張仕榮表示每次出街一定要着得好普通，最好就街坊裝：恤衫、牛仔褲加波鞋，貨物就放在背囊內，不會去太擠迫的地方，行經路線亦要小心選擇。若防範工夫做足仍遇劫，張仕榮說：「咁都俾賊人打劫，肯定係有內鬼啦，無鬼唔死得人嘅。」
張仕榮補充，他認為最佳防搶方法是，不在商舖當眼處交收，最好做到連商舖職員都不知運金人的身份，就會令賊人無從下手。