商品及服務稅（GST或稱消費稅、銷售稅）諮詢文件出籠之日，左丁山已收到幾封讀者電郵，一致反對銷售稅，睇落喺九個月諮詢期內，反對嘅市民會佔壓倒性大多數。反對銷售稅大聯盟副主席黃家和（餐飲業）講：「呢個係yesorno嘅議題，冇得中間落墨，特區政府引入此稅，即使稅率係零，我哋都反對。有咗呢個抽稅機制，他日政府就會慢慢提高稅率，由零至一，由一至三，由三至五；今年德國嘅銷售稅會由百分之十六調升至百分之十九，問你驚未，出外食餐飯，一個人要使六十歐元（連稅），故此德國人視出外吃飯為大事，餐飲業叫苦連天。我哋喺香港一定反對到底，冇妥協餘地，一於sayno。」
講得咁斬釘截鐵，反對銷售稅大聯盟主席方剛議員（零售界功能組別）如果得唔到自由黨撐實，咪好冇面？○八年唔使參選都得咯！另一位張宇人議員代表餐飲界，又係企硬嘅。立法會黨派之中，都唔知邊位會支持政府。啲大狀會唔會呀？想落打官司搵資深大狀上庭，收費好貴，一百幾十萬元閒閒哋，呢類服務徵收5%稅，客仔點會唔肉赤。
中產階級如何？靚女秘書V鬼殺咁嘈。佢掹車邊都叫做中產，尚未結婚，放假唔鍾意北上消費，鍾意慳慳埋埋，走去東京三四日，放假減壓兼去新宿、涉谷掃時裝，如果有咗GST，香港人出外旅遊購物超過三千元，要喺機場過海關被檢查、抽稅，排隊嘥時間唔在講，交多5%稅就冇法子唔牙痛。秘書V話：「唐太、葉太、陳太、曾太等等富家太太去米蘭掃貨，返嚟交稅，唔會志在，我哋係窮OL喎，好慘啫，唯一嘅購物享受都可能冇埋。」
不過唔使驚住，你我一齊反對嘅話，GST唔會落實，大家未必要上街示威反對嘅。可以一人一信寄去畀代表你嘅立法會議員，譬如九龍東就寄畀鄭經翰、梁家傑，沙田（新界東）就寄去畀劉慧卿、湯家驊，港島中西區就寄去畀李柱銘、余若薇，工人就寫信畀王國興、陳婉嫻，喝住班尊貴嘅議員唔好支持，否則○八年就唔投佢哋票。