年過20的朋友一定會對看卡通片有極大共鳴，因為以往睇卡通片必須要跟住電視追，第一點：謹記《430穿梭機》或者《閃電傳真機》的播映時間，第二點：就是逢星期六晚12點，一定要哺喺電視機面前，當年就捧紅了《聖鬥士星矢》、《龍珠》、《幽遊白書》等經典名作！今時今日的動漫迷就幸福得多，單靠互聯網就可以睇盡世上卡通，而且緊隨卡通片推出的大熱玩具水準比以往更加高。今個暑假上畫的動漫片或動漫真人版，例如Keroro軍曹、超人、反斗車王同變形金剛等，有電影大殺傷力催谷，玩具甚至一度搶斷！
記者：羅灝汶
攝影：陳偉強、伍慶泉、陳盛臣
萬人去捧Keroro
近年除咗《GundamSeed》的動畫、玩具叫做hit過一排之外，風頭最強當然係「Keroro軍曹」。自從04年Keroro軍曹首次動畫化之後，短短2年間已經風行港日台，fans更加要求製作電影版，今年3月日本就為咗Keroro舉行了首個大型首映會，慶祝Keroro進軍大電影！
今次Keroro首次登上大銀幕，朗豪坊就聯同電影公司建起了大型Keroro展覽館，當中最矚目當然係7呎高巨大化的Keroro同電影場景，另外商場更特別建造全球首部Keroro軍曹1:1列車，完全食番電車男個勢。主辦單位表示，上星期展覽開始至今就超過3,000多人參與Keroro1:1公仔抽獎遊戲（每日送1個），入場人士更加突破1萬，的確超級強勁。
上畫日期：7月27日
Keroro軍曹展覽館
地址：旺角朗豪坊
日期：即日至7月31日
電話：35202800
最強精品：Keroro推錢機
Keroro大受歡迎，主要可以分為3大原因：角色抵死、外形Cutie、內容夠過癮！由2歲到80歲都超級喜愛的5隻可愛青蛙，就連世界盃時Keroro軍曹都有穿起日本球衣為日本隊打氣，就知有幾巴閉！隨着Keroro大電影推出，一眾精品都成為搶手貨，精品方面毛公仔、錢箱、手機套、軟糖等應有盡有，近期最紅就係最新推出嘅Keroro系列推錢機、夾公仔機、扭蛋機同老虎機，玩具店表示每日推錢機都會售出10多部，日日都要重新入貨，除此之外，毛公仔同匙扣就最受女生歡迎，貪價錢平又夠可愛咁話。
反斗車王銷量增3倍
呢期《反斗車王》成為僅次於Keroro的暢銷產品，玩具店環球HOBBY館負責人表示：「《反斗車王》上畫前玩具已經非常好賣，上畫後更加激增3倍。」當中最受歡迎的就是《反斗車王》珍藏迷你車系列，全套有10多款，因為過於受歡迎，店舖只會於星期五、六、日分時段出售，點知電影上映後1個星期已經全線斷貨。建議各位fans去開玩具店入貨，一定要睇清楚有冇珍藏系列，因為一定炒得起。
上畫日期：上映中
超人系列全線仆直
相反《超人》電影玩具就失色得多，最大死因是《超人》系列玩具質素比較參差，而且角色就只有超人一個，很多客人買一個超人玩具就唔會再選擇其他產品。雖然電影方面大收旺場，不過對於玩具市場就幫助不大，玩具舖的業內人士表示：《超人》系列漫畫角色推出的玩具一向有捧場客，相反用電影版作藍本推出的超人就唔賣得，全因超人Fans多數都是來自漫畫，佢哋只會支持電影，而不支持電影玩具咁話。
上畫日期：上映中
變形金剛人氣必爆
動畫改編成大電影愈來愈普及化，即將於明年上畫的《變形金剛》就由史提芬史匹堡操刀，相信是最具人氣的電影！其實早在1984年，孩之寶推出第一代變形金剛（G1）玩具，已經大受小朋友歡迎；而根據官方資料，美國平均4個22至27歲的朋友就有3個人曾經玩過變形金剛！
相隔多年，香港終於有大型變形金剛展覽，會場中展出了變形金剛玩具的主要系列G1、BeastWars、BeastMachines、RID、Armada、Energon及Cybertron。超過500個不同款式的變形金剛一次過騷晒出來，當然唔少得博派同狂派的美日限定版玩具，會場中更有2米高的變形金剛模型。現場亦會首播預定於明年公映的《變形金剛》電影預告片。身為fans，當然關心有冇新玩具登場啦！今次展覽會有2個全港首次公開發售的《BeastWars》10周年紀念模型，《BeastWars》於香港都有播過，不過就改咗名叫《特種變形勇士》，冇晒feel，不過係fans點都要撐吓場。
上畫日期：明年夏季
現場晒珍藏
變形金剛展覽會
時間：即日至7月26日
地點：荷里活廣場
電話：21188811
（a）：TOYSHOBBY旺角信和中心1205室（27710981）
（b）：環球HOBBY館旺角彌敦道579號地下及2樓（27711930）