八方噚日喺書展見到長毛為新書《長毛直說波政不分》搞簽名會，都有唔少「粉絲」捧場，搞到佢鬼咁開心。
長毛話呢本係佢嘅處女作，所以特別緊張。唔好見佢平時成個粗人咁，其實佢唔單止字體秀麗，而且好有文采，話晒都係名校金文泰中學畢業生。長毛自序大爆當年戶口得番2,000蚊，突然《蘋果》請佢寫專欄，之後愈寫愈多。為咗趕交稿，佢曾經喺監獄度攞政府紙嚟寫，認真搞笑。
本書名副其實論政又講波，阿叔退咗休，睇嚟長毛有潛質頂上喎！
另外，特區政府嘅雀鳥專家睇嚟非天文台台長林超英莫屬，原來佢早喺90年代初期，已經開始繙譯有關香港雀仔嘅書籍，其後再增補，擴至香港及華南地區鳥類合共逾500種。
林超英出雀書
林超英話，呢本名為《香港及華南鳥類》嘅新書原作者係一位退咗休嘅英國特許測量師，當年做過觀鳥會主席，佢對雀仔真係好有感情，對推動香港觀鳥工作貢獻良多，事關自從譯成中文後，參加觀鳥活動嘅人數上升，北京，深圳同福建等地方都成立咗觀鳥會，對祖國都可謂有所貢獻。本書喺書展期間新聞處檔攤有得賣。