Game事撻：搶道具封死位玩《炸彈人》唔茅唔舒服

成日聽老編講，話《炸彈人》同班Friend玩對戰點正點盛，雖然小弟向來玩單機Game多，但都唔否認呢個被稱為「友情大考驗」嘅對戰佳品真係出色，無論響邊部機出都唔少人幫襯。如今佢登陸畫面靚靚嘅PSP，固然要搵《GameWatch》呢班專業人士親身試機，點知佢哋一玩就個個着晒火，仲激動到箍頸開拖咁款，《炸彈人》的確唔係浪得虛名！
文：陳福榮

1碟4打夠抵玩

以前PSP絕大部份嘅對打遊戲，都需要每個玩家自備一隻遊戲UMD咁至玩到，好似《MonsterHunter》呢種人人都有嘅超級大作就話啫，《炸彈人》通常都係招呼朋友至會開，唔通個個都要買定隻嚟等挑機咁無謂？好彩𠵱家啲廠終於進步咗，佢好似10月至出嘅《PowerStone》咁支援DownloadPlay，只要其中1人有碟喺手，其餘3位都可以單撈到專為對戰而設嘅遊戲部份，縱使要等耐啲都好過冇吖！但如果4個人都有隻碟嘅話，仲可以透過Adhoc模式玩到更多嘢，用Wi-Fi連線喺公司地鐵同人隨時挑機都唔成問題。

■點知1、2個回合後，兩名中國籍男子率先按捺不住，動手動腳「耍花槍」！

■將炸彈火力食到盡兼Link得好，真係會有炸晒成個場嘅震撼效果。

■玩咗咁多年，呢堆道具熟口熟面，知道邊啲值得去搶。

爆機解放經典元祖版

基本上PSP呢隻《炸彈人》，係由極似超任時代嘅玩法變成完全立體化，再加上初代充滿懷舊Feel嘅舊版圖合二為一而成，兩者都有其可取之處。先講佢嘅「老餅」部份，經典模式望落去對於玩慣紅白機版嘅人真係非常親切，事關佢係以呢個舊版作為開發基礎，只係將佢變成全3D顯示兼可儲存進度，咁嘅話玩齊全部50關都唔算太難嘅。而設有故事背景嘅正常模式方面，佢將100關分布喺幾個星球入面，每度都有幾難搞嘅波士例如巨大蜘蛛同鑽地長龍等，重點係點樣善用手上道具，皆因有啲真係非常好用，一個唔小心死咗就慘情到爆。
講開又講，個經典模式並唔係話玩就玩，玩家必須先打爆正常模式1次至Unlock到，希望Game書快啲有Save送啦，唔使嘥咁多時間慢慢煲佢至有得玩。

■經典模式即是立體化的初代《炸彈人》。

■周圍都是芝士和青瓜，版圖設計頗有心思　。

■早在超任版便有類似的頑強頭目角色。

蠱惑道具隨時用

今次喺正常模式仲有一個特別之處，就係食咗嘅道具唔會即刻見效，而係會暫時先儲起佢留嚟做Stock，等玩家喺真正有需要嘅時候至㩒出嚟用，一來能力叉爆晒嗰陣食咗唔會嘥，二來喺危急關口有時真係要靠多粒炸彈或者快鞋救命。尤其係啱啱俾人做低嗰陣，要用道具迅速扭轉困局，咁呢個系統就非常有用喇。
若論正常模式嗰100關，以前就話會有密碼俾你續關啫，𠵱家佢可以俾你儲存進度，唔使一次過衝到爆機咁慘，又唔使隨身帶備紙筆，真係爽到極點。

■取得道具會顯示在畫面左邊，只要選擇即能使用。

■貫穿炸彈雖然有用，但往往也會構成「自殺事件」。

■正常模式的版面構造較為複雜，具有多重層次。

■每個星球都有不同頭目需要對付。

Game書編輯教路
防守型：Joanne（機齡10年）

我就唔算玩得好叻，不過知道有啲人好鬼死賤，成日昅住你行埋啲死位放炸彈，迫你冇得走監生炸死，所以一定要提防對手一舉一動。

進攻型：Teddy（機齡15年）

玩《炸彈人》就梗係要奸㗎啦，唔係嘅話不如打格鬥Game好過。想贏得易就要鬥快執晒啲Item，因為有啲效果好正，例如骷髏炸彈已經玩殘人啦。

PROFILE

遊戲類型：動作
對應機種：PSP
遊玩人數：1至4人
開發廠商：Hudson
行貨售價：$288
售賣點：DreamStore（25753285）

NDS新作多花臣

除咗今日主題嘅呢款PSP版之外，其實廠方亦有照顧NDS機主嘅需要，喺同日推出咗玩法稍有分別嘅《Touch!BombermanLand》。佢嘅突出之處係主打非鬥炸玩法，講到白色炸彈人同班朋友喺海盜船遊樂場嗰度玩，需要花心思解破由小遊戲所構成嘅各種難關，先至能夠通往下一關藉以對付壞人。當然由於係NDS遊戲，會用到支Stylus好盡，近乎咩動作都可以做勻，冇齋玩鬥炸咁悶吖。至於佢嘅傳統玩法方面，不單止支援DownloadPlay1卡8打，仲對應埋WFC畀你上網搵人隻抽，最多可4人網上挑機，趣味性絕不下於PSP版。

■相比起PSP版，NDS這隻單看封面也知主要用Stylus來玩。NDS版$288

■為稱霸整個遊樂場，因而需要在每個關卡中勝出。

■收錄了大量讓人會心微笑的小遊戲，猶如《太鼓之達人》咁玩。

■想與朋友互炸一番，亦可從對戰模式選擇8人大混戰。