常識題！邊種生果含最高維他命C？十居其九嘅答案係橙，不過錯！然後會話︰「某黑加侖子飲品，話自己維C高過橙喎！」黑加侖子？再錯！問營養飲食顧問，答案竟然係跌眼鏡嘅番石榴！每100克果肉有成652毫克維他命C，至於最引起人錯覺嘅橙，原來竟然5名不入！並以33毫克攞個第6，真係呃晒！
記者︰劉昱蘭
攝影︰林栢鈞
示範︰油麻地明星海鮮酒家
曾東朋師傅（27812929）
鳴謝︰美國加州士多啤梨協會
維他命C龍虎榜
番石榴果汁豬柳 香過菠蘿咕嚕肉
價錢︰$17/4人
需時︰15分鐘
貴為果中之冠的維他命C老大哥，番石榴的獨特氣味，或者你會覺得好難頂，但用嚟煮咕嚕肉則異常地夾，入口有點點香甜，但番石榴味唔覺太搶，反而更能帶出咕嚕肉的鮮味；除咗維他命C高，佢鐵的含量都比其他水果更勝一籌，仲有豐富的鈣和磷，對一眾女士們，真係仲好過飲高鈣奶啦！
材料︰
豬肉4両、番石榴2個、三色椒各1/2個、蛋1隻、生粉適量
豬肉$18.7/磅（a）
番石榴$4/磅（c）
三色椒$12/4個（c）
簡易法
1.番石榴去核切角，將一半份量攪成汁；豬肉切件、三色椒切角。
2.打蛋；豬肉沾蛋漿上生粉；炸至金黃色；
3.略炒三色椒，加入豬肉略炒，最後放番石榴汁及果肉略煮即可。
貼士︰
炸豬肉的油並非愈熱愈好，30-40℃已足夠，秘訣是先用猛火滾油，夠溫度就收慢火，炸皮咁先夠脆。
奇異果咖喱海鮮 味道配搭好新鮮
價錢︰$35/3人
需時︰15分鐘
清新嘅奇異果溝濃味的咖喱海鮮，配搭真係幾新鮮！唔好以為呢個西/印Fusion菜，其實奇異果並非新西蘭特產，它的祖籍是中國，原名獼猴桃，含大量纖維，能促進腸道蠕動，有便秘困擾的人最啱食。
材料︰
番茄1個、奇異果2個、咖喱汁2湯匙、蝦6隻、葱少許
番茄$4/斤（c）
奇異果$2.8/個（a）
蝦$28/斤（c）
簡易法
1.葱切段；番茄切片；奇異果去皮去芯；蝦去頭開邊；
2.煎蝦備用；爆香葱後，先放番茄略炒，然後加入蝦及咖喱汁，最後落奇異果略煮即可。
貼士︰
如果想令咖喱更香濃，可另加2湯匙椰汁，及1湯匙淡奶，令咖喱色靚味香。
柚子桂花魚 味清唔油膩
價錢︰$22/3人
需時︰20分鐘
全靠味道清的柚子蜜，炸桂花魚的油膩全被一掃而空；柚子可降低血液黏滯度，減少血栓塞的形成，對血栓塞、中風等疾病有預防作用；而且柚子含有豐富蛋白質、有機酸、維生素及礦物質等人體必須元素，好多水果冇得同佢比。
材料︰
桂花魚12両、柚子1/2個、柚子蜜3湯匙、蛋1隻、水及生粉各21/2湯匙
桂花魚$2/両（c）
柚子$16.8/個（a）
柚子蜜$66.5/1,100克（b）
簡易法
1.桂花魚去頭去骨，開邊留尾，然後以橫直紋𠝹花；
2.打蛋後加生粉拌勻，魚沾蛋漿，炸3分鐘至金黃色；
3.柚子取肉，柚子蜜、生粉及水略煮，淋上魚面再放上柚子肉即可。
貼士︰
炸魚時，兩手攞着頭尾兩邊魚肉，保持形狀落鑊，就可炸出師傅完成圖的形狀。
木瓜豬𦟌燉螺頭 老火靚湯勁鮮甜
價錢︰$15/4人
需時︰30分鐘（未計煲湯時間）
材料︰
水6碗、木瓜4両、豬𦟌6両、栗子5粒、雞腳4隻、木耳1両、南北杏少許
木瓜$10/個（c）
豬$28/斤（c）
雞腳$9/磅（c）
簡易法
1.雞腳和豬𦟌汆水，栗子去衣後，放入水及南北杏先煲2小時；
2.最後將切粒的木瓜及已浸水的木耳（浸半小時）後下多煲1小時。
貼士︰
木瓜要煲湯，一定唔好買太熟，否則會煲到散晒！
士多啤梨盞 一口一個脆卜卜
價錢︰$25/4人
需時︰20分鐘
材料︰
去皮雞肉粒4両、三色椒2両、士多啤梨8個、蘆笋4條、小棠菜4棵、豆腐1件、越南米網4張、士多啤梨汁少許
蘆笋$10.9/200克（a）
士多啤梨$19.9/250克（a）
鮮百合$6/200克（b）
簡易法
1.蔬菜洗淨切好，豆腐蓋成心形備用；
2.越南米網炸成盞形；
3.雞肉、士多啤梨汁及彩椒一起炒熟，把已炒材料放在越南米網上；
4.小棠菜、鮮蘆笋伴碟。用小碟蓋好豆腐蒸熱，放入碟中，並鋪上加州士多啤梨，再淋上士多啤梨汁即成。
貼士︰
用湯殼炸米盞都可以好有「形」，所以並唔係乜高難度動作，家常都做到。
阿Sue表示，每日一水果，一定要堅持，因為維C唔會儲存體內；平常人1日要吸收50-60毫克維C，多出呢個數就會排出體外，所以一定要日日補充，至於病人或手術後，就要吸收比平常多一點的份量。
攝取充足的維C，可有助減緩老化速度，幫助預防某些癌症同心臟病，還能強化我們的免疫系統，降低血液中的膽固醇，減少血栓塞發生。不得不提，維他命C係水溶性的，所以以下介紹嘅食譜，絕大部份嘅生果都係最後落，煮太耐冇晒維C就冇意思啦！
（a）觀塘輔仁街百佳超級市場
（b）觀塘輔仁街華潤萬家
（c）觀塘瑞和街街市
＊以上價錢以7月21日為準