肥彭駕到，兩位政壇阿太暫時可以唞一唞，敷吓mask做吓gym再鬥過都未遲。事關呢幾日，睇怕都係肥彭嘅世界。呢位末代港督，風趣幽默；講到親民，堪稱香港揸fit人始祖（煲呔都係學佢），所以噚日肥彭所到之處，處處人頭湧湧，肥彭對fans來者不拒，一整日笑笑口揮筆簽名，唔知返到酒店會唔會手痛？
肥彭下星期一會重臨故居，即係禮賓府，同當日下屬、今日貴為特首嘅煲呔見面。當年佢一家五口，喺呢個官邸住過五年多，肥彭噚日大讚此屋風水好好，仲誇張到說冇地方好得過上亞厘畢道，但佢並無講明點解好，唔通因為住到三個囡囡靚晒，所以就好風水？
幾年下來，眼見煲呔扶搖直上，做埋特區最高話事人，雖然無人知肥彭到時會唔會同舊部把酒話當年，但肯定唔係淨飲茶、食個包咁簡單，起碼都會睇睇間新裝修嘅屋。禮賓府內嘅矜貴錦鯉「馳名中外」，連肥彭都話最想去探吓啲錦鯉喎，煲呔到時又可以施展佢同錦鯉訴心聲嘅絕技！
講起愛女孫女就興奮
肥彭，有名你叫，梗係肥人一個。但呢位肥人，勝在精力旺盛，一日走幾場全無疲態。好似佢噚日一朝早10點鐘，就準時去到中環某書局為佢本書《NOTQUITETHEDIPLOMAT》舉行簽名會。最好笑係佢自己都自嘲係肥佬一名，無情情用廣東話講咗句：「肥彭istoo肥」，𠱁到現場記者個個笑唔停！
肥彭之後去到萬豪酒店出席美商會為佢而設嘅午餐會，答完一大堆問題，簽完一輪名，就去亞視錄影。太太林穎彤一直陪伴在側。肥彭講起自己個孫女十分興奮，大讚大女潔思Kate生嘅孫女Isabella同二女麗思Laura生嘅Eldie非常lovely，又同媽媽一樣省鏡，所以自己成日同孫女玩。
至索嘅細女雅思Alice呢？大家都知佢做緊明星，而佢之前拍嘅印度戲仲喺倫敦上影，星爸肥彭形容非常成功；梗係，愛女擔正太旗，當然好睇。
撰文：許偉賢