春夏減價進入如火如荼階段，高級名店秋冬新裝又將上場，上季價位近萬的新貴MastermindJAPAN可謂男裝界話題作，連Chanel掌門人KaiserKarl都響晒朵話呢期至冧，連DiorHomme都可以暫且拋開，可見呢位Master嘅厲害；原來高處未算高，經已火速抵埗的06秋冬系列，終於突破5位數字大關，一條牛仔褲索價萬三，誇張！原來香港腰纏萬貫的時裝貴人，的確唔少喎！
記者：吳小明
攝影：何家亮
Model：Alex@StarzPeople
Grooming&Hair：EllyWong
貴到無譜
上季首度登陸的MastermindJAPAN，在日本本土已是超級人氣的HighEnd男牌，記得春夏季初登陸時，連時裝精Wyman都咋舌其取價之高昂，品牌設計師本間正章行事不算高調，但驕恣之氣盡流露於衣飾細節之中，布料非要最靚的不用，每件作品堅持全人手製作，細眉細眼濕星細節位極多，數量又少，再加上無往而不利的品牌Crossover伎倆，造成必搶，遠至巴黎的時裝圈都掀起旋風，成為Colette店內重點品牌。春夏季剛登陸Joyce時，不出一周經已出現斷碼斷貨，今季再度添食，秋冬系列用料更貴，取價當然更高，就算以HighEnd男裝計，以天價來形容也不為過。
一貴！最貴三寶！洗水牛仔褲$13,000
貴喺邊？灰色洗水牛仔褲，洗水當然算不俗，又有招牌的繡線Patchwork元素，但點講都Justify唔到要值萬三，惟有一句「時裝不能以常理推測」囉。
二貴！RockBandTee$6,400
貴喺邊？以T恤來講，六叉幾嘢仲唔係貴到飛起呀？女裝HauteCouture貴至幾十至上百萬我可以勉強明白，但男裝一件Tee……以IronMaiden樂隊Tee上的圖案再行拼貼出LoveandPeace字樣，要好仔細先睇得出。
三貴！骷髏頭衞衣$15,000
貴喺邊？衞衣正面有品牌字樣，全件圖案及品牌字樣全部不是一般的以顏料印上，而是以幼線繡上的，因為線條非常幼細關係，才有印花的錯覺，一針一線繡上的功夫當然較印花為多，加上全件衞衣均有不規則的挑線披口處理，簡單式樣細節複雜，唔親自摸上手根本睇唔出咁多花臣。
其他到港貴貨
愈乘愈過界出電單車
話說品牌成名慣技乃大玩交叉乘，過往跟過法國皮具世家Goyard、潮爆Figure王BE@BRICK等Crossover，最新力作經已超越潮界物事，連電單車都出埋；跟Yamaha合作出聯名重型機車，採用Yamaha車種，車身細部則由Mastermind設計，車身以黑色為主，再以純金去打造把手、倒後鏡、還有輪胎的鋼圈等等部位，奢華到極，後方煞車紅燈還是MastermindJAPAN的骷髏頭造型，一煞車就會睇到品牌Logo，勁！全球限量只做10架，還要在東京最潮的Loveless展出，售價要300多萬日圓。
Shoplist：
Joyce（28101120）
中環新世界大廈地下