電影翻拍成潮，你見到馬田史高西斯要拍《無間道》、彼德積遜翻拍《金剛》、就連最近大收的《超人》都係炒冷飯之作，創作上要找新題材的確難過登天，反而你唔翻拍、唔改編仲Out！今年暑假香港有《龍虎門》做改編代表、過江龍就有日本嘅《死亡筆記》，《死》於日本嘅票房已經衝破1.6億港元，計我話，下年你分分鐘見到西片都學會用死亡筆記去殺人，仲要殺死埋拉登！
記者：羅灝汶
攝影：陳盛臣、羅灝汶
《死亡筆記》日本賣1,500萬冊
《死亡筆記》（DeathNote）於2003年12月開始於《少年Jump》周刊連載的心理懸疑漫畫作品，連載結束於2006年5月，總共連載108回，推出單行本12冊。不講不知，《死亡筆記》係日本漫畫史上最快突破100萬本銷量嘅漫畫，由出版至今現時已經銷出超過1,500萬冊，雖然故事已經剛剛於日本完結，依然受到一大班Fans追捧，順理成章地亦成為香港最暢銷漫畫之一。出版商數度加印，香港方面由文傳出版，負責人Johnny表示實際銷量不方便透露，不過《死》就企穩文傳漫畫銷量第二位（僅次於《足球小將》）。漫畫屋雲起書店及書報攤均表示《死亡筆記》一直都係今年銷量最高漫畫，每期都會返書千多本，單單一間漫畫屋由第一期至今已經賣過2萬多冊，預計電影上映後漫畫銷量將會更加提升3成。港版《死亡筆記》出版至第11期，第12期結局將於漫畫節（28日）發售，到時大家就可以欣賞到最後結局喇！
日本電影公司就耗資20億日圓（約1.3億港元）拍成真人版電影，打破了類型漫畫最快改編成真人版嘅紀錄，《死》電影版將會於東南亞8個地區上映，日本票房突破24億日圓（約1.6億港元）。一早預定分上、下2部推出嘅《死亡筆記》真人版，相信10月電影推出續集時會有更加大迴響。 上畫日期：8月10日
故事介紹：
《大逃殺》主角由藤原龍也、瀨戶朝香、松山研一、戶田惠香主演。故事講述死神喺人類世界留下一本死亡筆記，由高中生夜神月拾獲，只要筆記上被寫上名字的人類都會死去。夜神月為了自己心中的理想世界，不斸殺死世界各地的罪犯，最後引來L及警方追捕。
《龍虎門》漫畫兩個版本
《死亡筆記》絕對係漫畫帶旺電影，再由電影帶番旺漫畫。而香港暑期猛片就希望用電影去反谷漫畫，同樣改編漫畫嘅《龍虎門》就天馬行空得多，因為原著都有幾個版本。為咗力谷電影，玉皇朝出版社就推出了《電影龍虎門》漫畫，故事配合電影推出，同時《新著龍虎門》早已有一班舊讀者，絕對係一雞兩味的示範作。《龍虎門》原名《小流氓》，係70年代的本地漫畫，由黃玉郎編著，他筆下的「三皇」乃俠義之士。其實80年代《龍虎門》曾改編成電影，即將上映的乃第二部電影。至於電影有冇實際提升漫畫銷路，漫畫屋或者租書店都未敢睇好，同時表示近年來本地漫畫成績未見突出，相比起日本漫畫的銷路更加差天共地，漫畫店@pm負責人：「香港漫畫創作空間太細，都係啲技擊打鬥，但今時今日讀者都追求故事性。」上畫日期：7月28日
專業人士推介：《死》大熱
李志清：「我自己都覺得《死亡筆記》係今年最值得一睇漫畫，改編成話題之作，我都會去睇。」
漫畫店@pm阿詩：「以閱讀數字嚟睇，《死亡筆記》同《Keroro軍曹》最多朋友借閱，今年推介漫畫我會揀《異能者》，如果個故事開拍成真人電影都會好有趣。」
《Ani-Wave》主編紀恆：「推介《生命彩筆》，故事好純真，比起一般漫畫更加細膩，唔會有打打殺殺，而且好有歐洲色彩。」
漫畫放題館負責人Machi：「除咗《死亡筆記》，《BLEACH漂靈》都好受歡迎，遲啲電視台會播動畫，應該可以更紅。」
《Gameone》CEO施仁毅：「今年我認為最值得追看係《霸》，因為日本人有天馬行空創意，不受道德所限，也不失商業元素價值，根據玉皇朝溫紹倫表示《霸》每期銷1萬冊以上，還在加印中。」
