係，又係講二少，但今日主要係講佢個「愛將」Jack哥，點解？因為𠵱家唔止成個太古坊，遠至中環金鐘嗰班白領、CEO，大家都好想學吓佢，點樣先可以響「唔知情」情況下，喺份合約度加條「安家費」條款畀自己，等他日換老細嗰陣，有機會袋番一千八百幾萬兼夾鬆人！咁真相究竟係點？當然，只有畀錢同收錢嗰兩位最清楚，但八方不妨同大家講講一個響太古坊流傳咗近五個月嘅古仔。
話說嗰區有一間老牌電訊公司，天生唔會坐定定嘅靚仔主席買咗返嚟之後，想要搵個賢能之士睇檔，後尾睇中火車叔叔，於是又出重酬呢一招撬佢過檔，咁初初一老一嫩係蜜月期，但整整吓火車叔叔覺得自己做到嘢但嚴重underpaid，尤其係拍埋靚仔主席身邊嗰班高手一比，點解自己朝八晚六收咁少，但人家連隻腳都唔使踏出鰂魚涌地鐵站就有錢收，咁咪好唔公平？於是乎佢條氣開始有啲頂住頂住。
閘前拉鋸無奈應承
咁靚仔主席呢，雖則話叫人睇檔，但都有畀心機執番靚間公司，最好就執靚埋個股價，等他日可以賣個靚價，唔使再俾公公婆婆鬧，咁後尾響佢同火車叔叔共同努力之下，成間公司真係叫做turnround，瓣瓣都有聲有色，但呢個時候，靚仔主席就覺得有人功高蓋主，so，後尾當火車叔叔就快約滿嗰陣，佢就採取拖字訣，同時亦開始headhunt人。
而呢幾個月呢，大家都一齊做嘢，你有你做公職，我有我去運動會宣示主權，一個話畀人聽自己有價有市，一個話畀人知自己先係真老闆！但後尾最令靚仔主席意外係，火車叔叔甚得持細股嗰班同胞歡心，講到明放靚仔主席走都得，但要留低火車叔叔做新掌門，呢個時候就輪到火車叔叔發圍。
話說今年三月派成績表嗰日，火車叔叔向靚仔主席正式宣戰，臨出閘嗰陣講明如果唔加嗰條安家費條款，佢老人家係唔會出閘嘅，於是大家響閘口各自打畀自己個師爺，最後，靚仔主席雖然好㷫，但為顧全大局迫於無耐都要應承，於是，大家最後響鏡頭前面咪見到有人話自己好多嘢未做完所以要留低3年囉！