由葉劉創立嘅「匯賢智庫」噚日又有新搞作，就係同科技園搞咗個有關知識產權嘅記者會。烈日當空，一大班記者山長水遠入到沙田科技園，點知又係上堂！
葉劉佢哋成班人馬喺發布會10分鐘前先駕到，「蛋白質博士」蔡宗衡（匯賢理事之一）叫記者排隊登記，葉劉就安坐等候，博士為咗葉劉連公關都要做埋。
記者會其實係IT堂，講足成粒鐘，又悶又聽唔明，問答環節只准問知識產權，成班記者鴉雀無聲，真係記者會嘅一大奇景。點知葉劉忽然扮醒，話「等我嚟扮記者」，仲成日重覆又重覆問有咩經濟效益，你話死未？
記者會進行緊時葉劉忽然手機響，嚇到佢成個彈起，仲離座聽電話。八方同班行家其實想知葉太對佢前上司肥彭以及陳太有乜睇法，點知記者會完咗佢阿姐急急腳走人，話下星期一午餐會先有嘢講。咁緊張，唔通係男友急call？