軟硬天師重出江湖，喺本月底踩上紅館舉行10場演唱會，兩位天師林海峰（Jan）同葛民輝相隔11年復合，借個唱又出唱片又出產品，兼夾為動畫配音搵真銀，加埋演唱會歌酬條數，馮仁昭估計佢哋賺過千萬。
前晚軟硬喺九龍城一間排舞室綵排個唱，主要都係同班舞蹈員試吓走位，唔見有跳舞。見阿葛同阿Jan好似貼錯門神咁，總係一個行東、一個行西，互不瞅睬。一有時間，阿Jan就煲煙刨雜誌，阿葛唔係飲嘢就係坐低閉目養神，總之兩個就好少走埋一齊啦。
外界經常傳佢哋心病，無論真假，有咁大嚿錢塞落袋，乜嘢都唔係重點啦，鬼叫佢哋都仔細老婆嫩咩？
Fans投訴貨不對辦
另外，噚日有30幾個fans喺軟硬位於銅鑼灣嘅舖門外鼓譟，投訴貨不對辦，仲搞到報警。由於只屬商業糾紛，警察嚟到抄低資料就走咗。當中清晨5點幾就排隊攞頭籌嘅英姐話：「又話每日都有新款，點知近一兩日賣舊貨都唔止，仲唔齊碼。」
為免事件愈鬧愈大，最後商台要派員調停，商台對外事務部發言人噚日話，派籌前已經通知輪候者暫時未有新款tee賣，佢哋仲話希望fans買嚟珍藏，唔好為咗炒賣而買喎。
