美股一向被公認為全球最成熟的市場，但唔知係咪中國人所謂「返老還童」，近期表現愈嚟愈「兒戲」。伯南克睇唔到半點周伯通的影子，但就係不折不扣的老頑童，上任至今不斷亂講嘢，一時扮魔鬼，一時扮救世主，搞到全球股市反轉再反轉。
伯南克周三晚扮演救世主，話美國經濟增長放緩，通脹降溫。市場馬上當美息見頂嚟炒，美股由頭升到尾，杜指大升212點或2%，收11011。杜指不但重返250日線之上，更升越大部份平均線收市，技術上突然轉強，刺激昨日亞洲股市全面急升。
趙飛雲雖然睇到大市現轉勢先兆，仲分析埋中移動（941）、滙控（005）及太古A（019）3隻強勢股蓄勢待發，但昨日港股大裂口高開321點，真係搭火箭都追唔到，惟有坐喺度睇人表演，而結果當然係愈挾高，恒指最後大升375點，收16472。8月期指收16495，低於現貨月期指27點，部份反映滙控及恒生（011）除息因素。
大市昨日由大戶玩晒，股票行內的散戶大部份睇多過做，冇貨唔會高追，有貨亦唔沽住，所以恒指大升375點，但成交僅267.5億元。趙飛雲固然是吃不到的萄葡是酸的，但港股近年由一班洞悉先機的外資大行及大戶玩晒，港股動輒大裂口高開或低開，散戶想跟搭順風車的機會被趕絕，難怪唔少股友都話玩到十分冇癮。
現水平稍回買入
市場炒息口見頂，地產股突然由冰冷變燙手，美聯（1200）正是樓市探熱針，睇好地產股，首先炒美聯。美聯昨大升7.7%，收3.50元。今日若見稍回可伺機吸納，升破50日線3.55元，首目標3.95元。
趙飛雲