滙豐大班鄭海泉同邵銘高，最近多咗個特別嘅「跟班」，呢個跟班唔只夠膽坐邵銘高張大班椅，又孖住佢出街去剪綵，兼且喺鄭大班身後，聽佢講工作進度。有咁特別嘅待遇，皆因佢參加咗一個比賽，贏得「全年最佳行政總裁」獎，獎品就係傍住兩個高層，行半日孖Beat！
呢位「跟班」名叫黃慧敏，係上智中學中六學生，佢參加咗獅子行搞嘅「學生營商體驗計劃」，砌低咗七十四個參賽者，先至做到「冧巴溫」，攞到呢個有錢都買唔到嘅機會！
除咗鄭大班同邵銘高之外，工商業務「貓姐」梁高美懿，都出過唔少力，事關佢係五強爭盃時嘅大會評判，佢仲同最高分嗰五個小CEO食過早餐，再個別同佢哋傾過偈，先至揀到呢個優勝者。
至於黃慧敏贏人哋啲乜嘢？就係有自信同識問嘢，事關佢夠膽兜口兜面問貓姐，作為公司少數嘅女高層，有冇面對過歧視事件！