近排陳太、葉太齊齊高調論政，相反，香港商界中最鍾意論政嘅朗尼陳啓宗，喺呢個時候不談政治，只談𢱑銀。近年佢檔恒隆地產喺大陸四處投資，噚日又同湖南省長沙市芙蓉區簽咗塊地，要嚟起恒隆商場。
芙蓉區區長鍾新蓮前日仲喺當地治緊水，噚日已經一身行政人員咁落嚟香港同朗尼陳簽約，大嗱嗱40億投資，所以鍾區長人到禮亦到，帶埋個「中國紅」瓷器花樽做手信。據說，「中國紅」特別之處係呢隻「紅」色要1450度高溫先燒到，而且每次只可以燒一個。朗尼陳有乜國寶未見過吖，但區長長途跋涉拎落嚟，朗尼陳亦珍而重之，戴晒白手套先拎。
朗尼陳噚日講開喺大陸投資，好自然就提到佢嘅得意傑作上海港匯廣場同恒隆廣場，點知講吓講吓，就講到佢個寶貝仔，朗尼陳透露，前日24歲生日嘅寶貝仔，就嚟搬去上海住，並唔係幫老竇睇住上海檔生意，反而係去搵嘢做，朗尼陳話：「老竇係可以幫佢搵到工，但年輕人應該靠自己嘛。」
寶貝仔志在上海
華華記得，佢呢個寶貝仔04年大學畢業，當時朗尼陳已經大爆個仔想返大陸闖天下，佢仲告誡個仔唔好去上海同北京呢啲大城市，因為嗰度全國精英雲集，叫個仔向西邊闖。不過，年輕人志在四方，自己都係精英，又有個有米老竇，使乜驚上海人噃！
李華華
讀者如有任何意見或報料，歡迎發送電郵至[email protected]。