地產代理界近年特別多管理大員，鍾意舞文弄墨出吓書，大部份都係將工作經驗整理成書，碰啱近年特別流行講求自我裝備，迎接挑戰嘅風氣，呢類管理階層經驗之談嘅消閒工具書，雖然有愈出愈多之勢，但仍有一定市場。中原新界區董事王浩聰，就趁呢期有大型書展，宣傳佢嘅新書《領導心法──故事管理學II》，透過68個實戰管理故事，同讀者分享吓佢嘅成功管人之道。
Chris王仲親自去書展昅一昅新書賣成點，聽書商講，會喺今個禮拜日，即係23號下晝三點，幫Chris王搞個簽名會㖭。
講開又講，地產代理界唔少阿頭，都好喜歡親力親為呢家嘢，除咗Chris王為新書親身去書展宣傳之外，祥益地產人力資源部主任黃詠琳仲厲害，為咗幫公司訂立更有效嘅培訓課程，特登走去報考地產營業員牌照試，話要親身體驗吓，提升咗難度嘅牌照試制度，果然認真。
所以話，成功需苦幹，做成功嘅阿頭，更加唔可以吞卜。