利世民周初同全世界講，今個禮拜嘅通脹數據一定差、差、差。大前晚，生產物價指數（PPI）一出，孫柏文大叫︰「落雨收衫喇！」前晚，消費物價指數（CPI）又遠高於預期，孫柏文又大叫︰「個天跌落嚟喇！」
伯南克誓神劈願話睇數據做人，所以我同孫柏文一早就有「理性預期」，估今個月數據凶多吉少，結果，伯南克一句話，就令到全世界股市無厘頭升幾個巴仙，連孫柏文都冇晒心機，又要小休一天。
最令人氣頂者，就係華爾街一眾冇腰骨銀行家拍掌叫好，連孫柏文都不如。此話何解？話說5月時，華爾街仍然唱伯南克「通脹鴿派」，又話佢冇決心打擊通脹，6月議息又只加0.25%，結果全世界睇淡美元，令金、油等原材料重拾升軌。事隔未夠一個月，全世界極速轉軚，連伯南克出爾反爾都挺，比香港政客有過之而無不及，究竟呢班炒家搞邊科？
剎那利潤或係慢性毒藥
利世民有理由相信，華爾街精英挺伯，無非希望阿伯蕭規曹隨，學格老一樣做跌市救星。其實如果閣下年資比較深，就知道當年格老上場，一樣俾華爾街精英唱淡，話佢不如上手保羅．沃爾克（PaulVolcker）般英明神武，結果一次股災，格老出手救市，贏得萬千掌聲，由嗰刻開始，格老就成為華爾街之友榮譽會長，一做十七年。個市由5月起下跌，已經挑戰技術阻力位好一段日子，後市去向盡在今朝，如果阿伯學格老托市，華爾街成功將聯儲局收為盟友，又係另一番光景矣！
不過，利世民要提醒各位，一時升市唔代表永遠，剎那利潤可以係慢性毒藥。家陣美元氾濫情況仍然處於警戒線之上，只要稍一不慎，可能會重演七十年代式滯脹（Stagflation），即衰退加通脹，到時大家有排捱，要等到另一個列根配沃爾克組合出現撥亂反正，經濟先可能有轉機。
計劃經濟︰統計師大過央行行長
講開通脹，就不能不提大陸。早幾日大陸公布第二季數據，全世界又講經濟增長太快，宏調又要落重藥。利世民聽到呢啲三流分析，真係哭笑不得。第一，經濟增長同通脹完全係兩回事，唔該大家重溫大學經濟入門先好亂噏。第二，大陸如果打擊經濟增長，只會令通脹更加嚴重。
如果大家唔明，就記實呢兩句定義︰1.「通脹＝太多鈔票追逐太少貨物」；2.「經濟增長＝更多就業＋更高生產量＋更高消費」。打擊經濟增長，就係令就業更少，生產更少，消費更少，又何來解決太多鈔票嘅問題呢？而且又邊有國家領導人會想就業更少，就算一黨專政都怕社會不穩啦！
大陸所怕者，係過度投資；而過度投資，因為借貸無度；借貸無度，因為地方政治冇王管；地方政治冇王管，係因為法治不全。𠵱家過度借貸，令整個財經制度風險大升，情況有如將所有錢借畀孫柏文買「花旗國小組首名出線」，贏出尤自可，輸咗大乜鑊！如果係真正自由市場，部份資金高風險，部份資金穩守突擊，又何來「過度」投資？
睇大陸數據公布，一個乜乜統計師，連基本經濟原理都糊裏糊塗，確實體現計劃經濟嘅獨特性。不過，遠在花旗國嘅阿伯咪一樣對統計師言聽計從，搞通脹目標設定，所以難怪自由市場人士個個話佢係凱恩斯干預派，你話點叫人睇好花旗國未來經濟，點會對美元有信心？
利世民